Shillong, Naitung 26: Ka KSU SWKH ka ai khublei ia u CEM KHADC uba la kren shai ha khmat ka National Highway Infrastructure Development Corporation Ltd ha New Delhi ba um lah ban ai NOC iaka Two Lane na Nongstoin sha Mawthabah . Ngi ai khublei ruh ia u bah Hadrian Lyngdoh EM Mining kiba baroh arngut ki la pyni iaka jingshlur jongki ban kren iaka jingshisha halor kane ka surok kaba la pyni shai haka objective jongka ba kadei ka pre-uranium mining activity.
Ka KSU SWKHD ka dawa naka sorkar ba kumba ka la ong ba kan pynsangeh ruh iaki pre-uranium mining activity jongka UCIL ba kadei ban tip ba kane ruh ka dei ka pre-uranium mining activity. Kumba ka UCIL kadei ka tnad jongka Central government ka sorkar ka dei ban sngewthuh ba ki Pre-mining activity ki lah ban wan na kino kino ruh ki tnad ne Dept jongka sorkar.
Haba iadei bad ka jingkynthoh jongka Langrin Area Development Organisation kaba ong ba kiba pyrshah surok dei kiba im ha sor ka dei ka jingkren lap lah naba bun kiba pyrshah ki dei ruh ki ba na katei ka thain. Ka kam tih uranium bad ka surok uranium ka dei ka kam iap kam im jongka Jaitbynriew bad ka donkam namarkata iaka jingiapyni lang jong baroh ki dkhot ka Jaitbynriew na baroh ki jaka bad na kylleng ki jaka jongka Jylla.
Ka jingong jong u bah Pyndap L. Marshilong ba ka LADO ka pyrshah ia u uranium bad ka Kyrshan iaka surok uranium ka iatyngkhuh hi bad ka statement kaba u kren kumba ka la paw ha ki kotkhubor kaba ong ” Lada pyrshah surok dei ban tih noh ia u uranium bad bret sha duriaw”. Ngi kyntu iaki paitbah ba kidei ban husiar ban nym shah ialam bakla naba don naki nongialam jongki kynhun Kyrshan surok uranium kiba la dep aiwai ia ki jaka kur jongki sha ka UCIL naduh u snem 2009.
Ka KSU SWKH ka dawa na ka sorkar jylla bad n aka tand kam poh iing jongka Jylla ba kadei ban phah sangeh noh iaki agent jongka ban wan wad ktem haka ban buh iaki Temporary Police Camp na Rangblang terter haduh Mawthabah naba ki paitbah jong katei ka thain Kim pat donkam police ia mynta. Lada ka sorkar kam don jingthmu ban leh donbor ha kaban khlong ia une u marpohkhyndew ka la dei ban pyrkhat bha ym ban thaw mushlia bad wanrah hi iaki jingeh.
Ka KSU SWKH ka kren da kaba shai ba ym don jaka iaki exploratory mining, drilling activities bad uranium mining hapoh South West Khasi Hills District bad lada ka sorkar ka nud ban thom da ka bor ka hi kan hap shim jingkitkhlieh lada jia eiei, la ong u Bah Forwardman Nongre President, KSU SWKHD.
