Shillong, Naitung, 02: Ka Hynñiewtrep Youths’ Council (HYC) ka pynrem jur iaka jubab jong u Myntri ka koit ka khiah ka jylla, u Wailadmiki Shylla, halor ka jingjaboh ka lyer kaba la nang jur ha Byrnihat.
Ha ka por ba ka thain Byrnihat kala shah kdew bunsien kum kawei na ki jaka ba la shah ktah jur na ka jingjaboh ka lyer kaba mih na ki karkhana, ka jingong jong u Myntri ba ym pat ioh pdiang kano kano ka jingujor ba thoh sha ka Sorkar halor kane ka bynta, ka pyni shai iaka jingbym shimkhia jong ka sorkar ia kane ka mat kaba ktah beit iaka jingim bad ka koit ka khiah jong ki paidbah.
Ka jingjaboh ha Byrnihat kam dei satia ka mat kaba thymmai. La bun snem mynta, ki paidbah nongshong shnong ka thain kila mad iaka lyer jaboh, ka tdem na ki karkhana bad ka jingjulor jong ka mariang kaba mih na ka jingtreikam jong ki karkhana bapher bapher ha katei ka thain, kynthup iaka karkhana shna ethanol.
Kumta, ka long kaba ym lah satia ban pdiang ba ka sorkar jylla kan leh kumba kam tip ne kam pat sngewthuh iaka jingjur bad jingktah jong kane ka jingeh.
Ka HYC ka shem ba ka long kaba sngewkhia shisha ba ka Tnat ka Koit ka Khiah kan shu ap haduh ba yn da phah da ka jingujor jingthoh shwa ban leh eiei halor kane ka jingeh kaba la paw paidbah.
Haba ka jingjaboh ha Byrnihat ka la long ka mat jingiakren paidbah bad kaba la mih bunsien ha ki lad pathai khubor, ka kamram jong ka sorkar kam dei ban shu ai daw hynrei ban shimkhia mardor da kaba leh iaka jingwad bniah halor ka jingktah ha ka koit ka khiah jong ki paidbah bad ban pynshitom iaki karkhana kiba donkti ban pynjaboh iaka mariang.
Namarkata, ka HYC ka dawa iaka sorkar Meghalaya ba kan tuklar mardor ia kane ka kam bad ban shim da ki sienjam kiba tyngeh pyrshah ia kino kino ki karkhana kiba pynkhein iaki kyndon iada mariang bad kiba buh jingma iaka jingim bad jingkoit jingkhiah jong ki paidbah.
Ki paidbah ka Byrnihat bad ki shnong ba marjan ki don hok ban ioh iaka lyer kaba khuid bad ka jingiada kaba pura na ka bynta ka koit ka khiah jong ki.
Lada ka sorkar jylla ka dang bteng ban sngap mynthi bad nym leh ei ei ia kane ka mat kaba ktah iaki paidbah, ka HYC kan ym banse ban leh ei ei ban dawa iaka hok pyrshah iaka sorkar bad iaki karkhana kiba don bynta ha kane ka jingpynjaboh kaba la buh jingma iaka mariang bad iaka koit ka khiah jong ki paidbah.
