Shillong, Naitung, 02: Ka Meghalaya Energy Corporation Limited (MeECL) kala phah iaki nongtrei ban ot iaki waiar kiba la wah rynjain ha ki dieng post elektrik kiba don ha ki thain khyndailad ia kaba la sdang mynta ka sngi ban ot.
Katkum ki khubor kiba la ioh ka daw jong ka jingphah ot noh ka dei namar ba kila shu wah rynjain bad kane kala wanrah iaka jingwit iaka leit ka wan ki briew, ki kali bad kiba la pyn jaboh jabain iaka madan madiah.
Kumba ka long baroh la iatip ba ka khyndailad ka dei ka pdeng jong ka nongbah Shillong ha kaba ki nongwan jngoh kai pyrthei bad kumjuh ki paidbah nong shong shnong ki ju leit ban leit iaidkai pyngngad ha khyndailad bad ka jingdon kine ki waiar kiba wah rynjain kila pyni jaboh ia katei ka jaka.
Ka jingot iaki waiar ka dei tang ia kito kiba khlem pyndonkam shuh hynrei la shu ieh iaki rynjain, hynrei iaki waiar kiba dang pyndonkam la buh iaki bad la teh bha khnang ba kin nym saphret ha ka jaka ba la teh iaki.
