Shillong, Rymphang 02: Ka seng All Meghalaya Commercial Vehicles Owner’s and Driver’s Union (AMCVODU) ha ka sngi saitjian kala pynlong ia ka jingialang ha Lad Nongkrem ha kaba ki nongkit kam kila ia poi na kylleng ka Ri Khasi Jaintia ban ia shim bynta ha kane ka jingialang.
Ha kane ka jingialang kila ia kren ia ka jingkiew dor palat ki khajna ia ki kali, hyrnei kaba sngewshih ka long ba ka sorkar ia ka bai kali pat ka khlem pynkiew naduh u snem 2011. Ia kane kila ia kren bha ha katei ka jingialang ha kaba ia dei bad ka dor bai kali.
Ka wei pat ka phang ka long halor ka jingshah pyndik palat jong ki kali kamai ha ki pulit, kane kala buh jingeh ia ki nongiew bad kum juh ia ki nongleit nongwan, kaba ka seng ka sngewlyngoh ka long ba ia ki kali saw jong ka sorkar kiba kamai pat kam don kata ka jingpyndik wat la kit hep kumba thep jhur.
Wat la ki kali kamai kila siew ia ka khajna hynrei ka jingdon bun ki surok kiba ym shah ban rung kala buh ia ki kali ha ka jingeh. Kila ia kren ruh ia ka jingai laisen pathar ka ophis jong u DTO ia ki briew kiba na bar kala ktah ia ki trai jylla.
Nalor ka jingbym biang ki jaka ieng kali ha kane ka nongbah Shillong ka sorkar pat ka shah ia ki kali kiba wan na sha bar ba kin rung sha duh ki nongkyndong kane kala ktah ia ka kamai jong ki trai jylla. Ka seng kala ia kren ruh ia ka jingpyndon kam ki iing bsa ia ki kali shimet ban leit kamai ka ktah ia ka kamai jong ki ba buh kali.
Ha kane ka jignialang la ia kren ruh ha kaba ia dei bad ka jingrem palat ka bai HSRP bad ka bai khyrdop. Ha kane ka jingialang la ia kren ruh ba ki Hospital ki dei ban shah ia ki Taxi ban ieng ha ka por ba ki leit ban buh nongpang ha phyllaw jong ki.
La ia kren ruh ia ka jingpyndik palat ki pulit Assam ia ki kali na Meghalaya, ia kine baroh ka seng kan leit ban pynsngew sha ka sorkar. Kane ka long katkum ka kyrwoh kaba la phah da u Bah Egenstar Kurkalang president jong ka seng.
