Shillong, Rymphang 26: U Myntri Rangbah ka jylla u Conrad K Sangma haba jubab ia ka jingkylli jong u bah Gabriel Wahlang ba kumno ka sorkar kan leh ban ia khun pyrshah ia ka jingbym ioh kam, la ong ba ka sorkar kala shim bun ki lat ki lynti ban ia khun pyrshah ia ka jingbym ioh kam.
Ki lat pynioh kam kiba ka sorkar kala shim ki long kum ka MGNREGS, CM-Elevate, Prime Program, Focus, Focus+, Mission Mood Programs in Agriculture, Meghalaya Grassroots Music Project, Chief Minister’s Youth Centre, National Rural Livelihood Mission bad Skills Meghalaya.
Haba jubab ia ka jingkylli bynra ia ka jigndon kiba khlem kam ha ka jylla, u myntri rangbah ka jylla la ong ba ka jingdon kiba khlem kam ha ka jylla ka long 3% katba ha ka Ri baroh kawei ka long 4.7%. Ha kine ki lai snem kiba la dep lah ban ai kam ia ki 2.34 lakh ngut bad ha kine ki san snem ban wan yn pynioh kam 5.5 lakh ngut.
Katba tang ha ki kam sorkar ha kine ki lai snem la lah ban thung kam 3000 ngut, kine ki long tang ha ki tnad sorkar kiba heh, katba ia ki DSC khlem pat khien, ha kane ka jingkhein khlem khien lang ia kito kiba shah thung ki ba trei sngi, kiba trei shipor.
Na ka 5.5 lak ngut kiba ka sorkar kan ai kam ha kine ki san snem ban wan, ka sorkar kala buh thong ba 2.5 lak ngut kan long tang ha ka kamrep, shilak na ka bynta ki kynthei na ka skhim NRLM, na ka skil Meghalaya yn pynioh 1.2 lakh ngut, na ka tnad shangsuwari kan long 50000 ngut, na ka CM-Elevate 50000 ngut, na ka IT Park shillong bad Tura kan long 25000 ngut bad 10000 ngut kin sa ioh ban thung kam.
