Shillong, Risaw 13: U bah Vicky Nelson Marbaniang na ka thain pynursla mynta ka sngi la pynpw ia ka jingsngewsih ba ka sorkar Meghalaya kala kyntait ban ai ka jingithuh ia ka kompnei kaba u la seng ka “Techno Beet India Limited”.
Haba kren ha ki lat pathai khubor mynta ka sngi ha Shillong Press Club u la ong ba kan long kaba eh ia ki khun samla ban wat kam sorkar, hynrei don kam ia ki samla ban pyntbit ia lade ha ki kam ban trei bad ki kompeni ne seng kam la jong.
U la ong ba ia kane ka kompnei kaba u la seng kaba la tip kum ka “Techno Beet India Limited” ka long ban ai jinghikai ia ki samla ka jylla Meghalaya khnang ba kin ioh kam ha ki karkhana bad ki lah ban seng ia ki kam la jong, hynrei kaba sngewsih ka long ba ka sorkar kam shym la ai ia ka jingithuh.
Kum u samla ba dei na ka thain Pynursla u la leit ban ia kynduh ia u MLA jong ki u bah Preston Tynsong ban pynsngew ha u ia kane ka jingthmu kaba u don bad ha kaba sdang la ai mynsiem bad u la iaid sha khmat ban pynkhreh ia kane ka kam.
Ha dien ba la dep pynkhreh u la leit biang sha u bah Preston ban pan ia ka jingithuh na ka sorkar ban sdang ia kane kam, u la ong ba ka jingiakren ka long ba u kwah tang ba ka sorkar ka dei ban ai ia ka jingithuh um kwah pisa ei ei ruh em na ka sorkar namar khlem ka jingithuh ka sorkar um lah ban sdang ia ka kam.
Ha dien ki jingiakren ka sorkar ha kaba khatduh ka jubab kaba u ioh na ka sorkar Meghalaya ka long ba kan nym lah ban ai ia ka jingithuh da kane ka jingbym treh ka sorkar jylla ban ai ia ka jingithuh kala pynlong ia u ban duhnong da ki phew lak tyngka ha kaba pynkhreh ia ka skhim.
La iathuh ba ha Meghalaya mynta kidon hynniew tylli ki kompnei ban ai jinghikai ia ki samla ban pyntbit ha ki kam ki kam, na kitei hynriew tylli ki dei kiba na bar ka jylla Meghalaya bad kaba na kane ka jylla dei tang jong ka Don Bosco Technical School, Shillong.
U bah Vicky la ong ba kane ka jingbyntreh ka sorkar ban ai jingithuh ka kren shai ba kam kwah ba ki khun samla kin ieng hala ki jong ki ktah, ka kwah ba ki samla kin leit ban dem ha khmat jong ki ha kum kane ka por elelction, u la kynnoh.
