Shillong, Naitung 21: Mynta ka sngi u symbut myntri rangbah ka jylla u bah Prestone Tynsong u la khot ia kren ia ki nongalam jong ka MSSASA ban ia kren halor ka jingdawa ka jong ki ia ka tulop, ha kane ka jingiakren la ia mynjur ba na ka san bnai ka sorkar kan siew noh saw bnai.
Ha kane ka jingiakren ka long ba ka sorkar kan pynlait noh ia k pisa T.44 klur kaba dei ka bhah jong ka sorkar jylla mynta ka sngi, ha ka juhka por ka sorkar kan sei pisa na thup buh pisa jong ka sorkar T.78 klur bad ia kane ka juh ka pisa yn sa thep biang ynda ka sorkar pdeng kan pynlait ia ka pisa ba dei ka tulop jong ki nonghikai SSA.
Ia katei ka pisa baroh thep sha ka bhah jong ka Single Nodal Agency ha shuwa ka 27 tarik mynta u bnai, la bthah ia ki nonghikai SSA ba kin weng noh mardor ia ka jingiakhih bad ia ka tulop shibnai kaba sah pat yn siew mar ia ioh ia ka pisa na ka sorkar pdeng.
U bah Aristotle Rymbai haba kren bad ki lat pathai khubor ha dien ka jingiakren la ong ba u dap da ka jingsngew kmen ba ka sorkar kala shim ia kane ka rai ban siew noh ia ka tulop saw bnai bad kan sa but sa shibnai ynda la ioh na ka sorkar pdeng baroh ka long T122 klur tyngka.
Ha kane ka jingiakynduh la ia kren halor ka jingpynkiew ia ka tulop ia kane kan dang peit bniah ha ka Education Commission bad la ia kren ruh ia ka jingslem jong ka tulop, ia kane la shim ia ka rai ban pynlait noh man ka lai bnai.
