Shillong, Iaiong 21: U myntri rangbah ka jylla u Conrad K Sangma mynta ka sngi ula pyntip ba ka sorkar kan pynthymmai bad kan wanrah ka jingpynkylla iaka rukom trei kam treijam ha ka jylla.
Haba kren haka jingrakhe iaka 16th National Civil Services Day u Conrad ula iathuh ba ka sorkar ka la thmu ban don da ki nongtrei mon sngewbha lane Volunteer na ki shnong ba kin long ki nongmihkhmat ka sorkar ha ki shnong jong ki.
U Conrad ula iathuh ba ka sorkar jylla ka la ithuh kumba 6500 ngut ki Volunteer ha man la ki shnong ki ban don ka jingiasnoh bad ka sorkar lyngba ka thup lum jingtip lane Central Database bad lyngba kane ka sorkar kan ioh jingtip halor kiei kiei kiba jia ha ki shnong jong ki
Kine ki Volunteer na ki shnong ki lah ban pyntip sha ka sorkar ha ki por ki jingjia kyndit kum ka jingshlei um, ka jingtwa khyndew, ka jingthud ha ka bording bad um lada don ka jingbthei ha ka Transformer lane ha ki pipe um, la ong u Conrad
Shuh shuh ula ong ba kane ka jingdon ki Volunteer kan plie lad ruh ia ki ban long ki nongrah khubor kiba konsan sha ki Bank khnang ba ki skhim sorkar kin poi sha ki briew haduh ka jingkhang ïing kum kiba la noh ka rta kiba ïoh pension, kiba don ïa ki jingduna ha ki dkhot met bad kiwei, kin ym donkam shuh ban leit sha ki ophis block ne sha ki bank.
“Lyngba ka jingdon ki Volunteer, ka sorkar jylla kan iatreilang bad ki shnong khamtam haba iadei bad ka jingpyntreikam iaki prokram ban kyntiew iaka roi ka par kum ki Self Help Group ki ba don ha man la ki shnong khnang ban pynkloi bad pynsuk ïa ka jingpynpoi ia ki skhim” la ong u Conrad.
U Conrad ula ong ruh ba ka long kaba donkam ban pynkupbor bad ban pynkhlaiñ ïa ki Gram Sevak bad ban peit ruh halor kumno ban nang pynjanai shuh shuh ia ka rukom trei jong ki Gram Sevak.
U myntri rangbah ka jylla ula iaroh ruh ia ki ophisar ha kajuh ka por, ula kyntu ruh ia ki ba kim dei ban ailad ba ka bor, ka pisa bad ka jingshah pynshoi ban ialam ia ki hynrei kum ki ophisar ki dei ban pynshong nongrim beit kumno ban ai ka jingshakri ia ki paidbah.
Ha kane ka sngi na ka liang u Chief Secretary (CS) ka jylla u bah D.P Wahlang ula wanrah ruh ia ka Civil Service Award ha ka jylla kaba ia syriem ia ka National Civil Service Award na ka bynta ban pynkupburom ia ki ophisar ka jylla.
