Shillong, Lber 24: Ka sorkar MDA ba la lam khmat da ka party NPP ha Meghalaya ka i long kynrum kynram bha mynta. Ka jingiakawang ktieh ka iai bteng man la ka teng hapoh ki party ba ialong paralok jong ka sorkar MDA.
Party KHNAM, ka party BJP bad mynta sa ka UDP ki ia pynpaw beit thrait thrait khlem salia ia ka jingdkoh ka rukom treikam kane ka sorkar synrop MDA wat la ki don ha kajuh ka skum sorkar.
Nyngkong eh,ngi iohi ba ka party KHNAM kam da iahap bad ki policy ne mat treikam jong kane ka sorkar,hynrei namar ba ka don tang uwei u MLA, u nongialam rangbah ka NPP na Khasi-Jaintia um da salia than hynrei u kren kop pynban ba ki party ki bym sngew tynnad ia ka MDA hapoh ka jingpyniaid bastad ka NPP, kin sngewbha ban mih noh na ka skum sorkar MDA namar kam don satia kano kano ka jingktah ia ka jingskhem jong ka sorkar MDA.
Hadien kata pat,, kynthah sa ka party BJP lyngba u state president jongka ban pyrshah ia ki kam bamsap bampong jong kane ka sorkar khamtam ha ka khaii dewiong beain bad ka bamsap ha District Councils.
Ka NPP hangta lei lei ka nang dom nangbitar shuh shuh bad ka la maham tyngeh ia u state president ka BJP ba um dei satia ne um bit satia ban pynpaw shabar khamtam ha ki kot khubor ia ka skum MDA laitnoh tang lyngba ka Coordination Committee ha ka MDA U nongialam rangbah ka NPP na Khasi-Jaintia u la ai ruh ka jingmaham kaba tyngeh ba ka bha ia ka BJP ba kan mih noh na ka sorkar MDA lada kam sngewtynnad satia ia ka MDA hapoh ka jingialam ka party NPP.
Ki MLA jongka pat,ioh liat na ka shuki jem,i kumba ki iashah NPP pynban.Ki ong ba ka dei tang ka kam shi met u president bad kim tip ei ei ia kata, bad ki mut pynban ban ia sylla ban pynhiar ne sloit shuki noh ia une u state president jongka.
Wat u Chief Minister ruh u la pynpaw ba un report sha ki nongialam rangbah ka BJP sha Delhi halor ka jingweng noh ia u state President ka Meghalaya unit.Ym tang katta,uwei u Minister ka BJP u la pynpaw pyrthei ba um sngewtynnad ia ka rai ka Cabinet halor ka jingmap shiliang khmat ka sorkar ia ka income tax ia ki AIS kiba trei ha Meghalaya.
Uno uno u Cabinet minister ulong binding ia ka rai ka cabinet bad lada u pyrshah ne um hun ia ka rai ka cabinet,u Chief minister udei ban weng noh ia u na ka ministery kumba la jia ia u Bah DP Iangjuh ha ka por u( L) FA Khonglam ba u pyrshah (note of dissent ia ka rai ka cabinet halor ka online lottery system.
Mynnin pat,pynmih jingkynthoh sa u General Secretary ka UDP ban weng noh ia u minister ki kam bording namar ka jingbym lah jongu ban pyniaid ia ka kam bording.Une u General Secretary ka UDP ruh um dei satia u MLA hynrei u kynthoh lyngba ki kot khubor da kaba iaid lait ia ka Coordination Committee ka MDA kumba leh hi ka BJP.
Ki minister UDP ki lah ban kynnoh ba ka dei ka kam shi met jongu khlem ia tip lang namar ioh shah weng noh na ka shuki mum mum kaba jem jongki.Lada ka NPP kam nud ban phah mih noh ia ka UDP na ka sorkar MDA kumba ka la leh ia ka KHNAM bad BJP,kata,ka leh shiliang khmat.
La kiba rit bad kham tlot nud ban leh,katba ia kiba ktah ia ka jingskhem ka sorkar pat kim nud lada ka NPP ka leh bein bad leh shiliang shisha ia kiba rit, bad ba tlot kan sa liem ha kiba kham khlain ha kawei ka sngi.
