Shillong, Rymphang 9: Ka jingiakhih sangeh kamai jong ki kali kamai hapoh jong ka lama Meghalaya Joint Action Committee on Commercial Vehicles kala poi sha ka sngi kaba hynriew, ban dang pynjur ia ka jingiakhih mynta ka sngi ka seng kala pynlong ar tylli ki jingialum paidbah.
Ka jingiakhih shat hang kaba la pynlong da ki nongniah kali ha Mawdan Malki ha kaba da ki bun bun ngut ki nongniah kila ia shim bynta ha kane jingiakhih, kiba la wan ban ia shim bynta ki long na kylleng kane ka nongbah Shillong bad khap sor.
Ha kane ka juh ka sngi ka seng kala pynlong ia ka jingialang paidbah ha Mawphlang ha kaba u nongialam ka seng u bah Wandonbok Jyrwa u la pynshai paidbah ha katei ka jingialang lang ba balie ki hap ban pynlong ia kane ka jingiakhih.
U bah Jyrwa u la ong ba ka sorkar pdeng ka shim khajna T.16.50 tyngka ia ka petrol bad ia ka Diesel katba ka sorkar jylla balie ka shim haduh T.31 tyngka, hato kane kam dei ka jingban bein ia ki paidbah kiba hap ban mat ia ki jingeh.
Ka jingdawa ka long ban map ia ka dor khajna kali da 50% ka daw ka long ba ha u snem 2020 kim shym la ioh ban kamai na ka daw jong ka COVID-19 bad haba la pynlait pat la ong ba kin shim ia ka dor kaba rim katba ka umphniang kala kiew palat pud.
Ha kane ka jingialang ha Mawphlang ia ka jingialang la pyniaid da u bah Did, bad ki nongkren ha kane ka jingialang ki long na ki president jong ki seng nongniah kali na ki dong bapher bapher jong ka thain.
