Shillong, Nailar 4: U Shongknor jong ka Mawmluh Cherra Cement Limited (MCCL) u bah Wailadmiki Shylla u la ong ba ha dien ba ka kabinet kala shim ia ka rai ban pynimbiang ia ka karkharan pynmih dewbilat ha Sohra da kaba ia treilang bad ki riew shimet, ka tnad karkhana jong ka sorkar ka dang pynkhreh mynta ia ki kyndon.
Haba kren ha u SP News Agency, u bah Shylla u la ong ba, na ka liang jong ka sorkar jylla kala kren shai ba kan nym bei pisa shuh ia ka MCCL, ban bei pisa ban pynim ia kane ka karkhana pynmih dewbilat yn dei na ki riew shimet ki ban ia trei lang bad ka sorkar ha kane ka karkhana pynmih dewbilat.
Ka bynta kaba kongsan kaba ka sorkar kala buh ha khmat ka long ka jingshiang bad ka jingiada ia ki nongtrei kiba don hapoh jong kane ka MCCL, haba ia dei bad kane ka sorkar haduh mynta kam pat shim ia ka rai katno ka sorkar kan ai ia ka bhah sha ki riew shimet bad ka sorkar kan bat katno ka bhah.
Na ka liang jong ka sorkar kala aiti sha ka tnad ba dei peit ia ki kam karkhana ba kin pynbit pynbiang ia ki kyndon baroh ha dien ba la pynbit pynbiang kin sa aiti sh aka MCCL ba kin ia peit bniah ia ki kyndon namar ha kane ka bynta ki trai hima jong ka Sohra ruh ki don ka bynta ha kane ka karkhna.
Katkum ka jingjurip haba ia dei bad kane ka karkhana ka kaiphot ka kren shai ban pynimbiang ia ka MCCL hap ban pynlut haduh T.195 kur tyngka, ha kane ka bynta ka sorkar kan nym bei pisa shuh kane ka long shai kdar, ka sorkar kan buh bhah da ki kor ki bor kiba la don bad ia ka jingpynlut ban pynim ia ka yn leh da kito ki ban ia treilang bad ka sorkar halor ka MCCL.
