Shillong, Jymmang 19: Ka Upper Shillong Sports Social bad Cultural Association (USSS&CA) ka la ioh pat ban pynlong ia ka 14th AS Khongphai Memorial Football Tournament 2024 na ka bynta ki khynnah ki ba hapoh ka 15 snem ka kyrta ne Under – 15 mynta ka sngi ka 18 tarik u Jymmang 2024.
Ia kane ka lympung ia lehkai la wan ban plie pyrda da u President jong kane ka synjuk u bah E Kharkongor kum u kongsan ha ryngkat ka jingiadon lang u bah S Kharsohnoh u ba dei u Secretary jong ka Shnong Nongumlong kum u symbud kongsan bad kum juh ruh u General secretary kane ka synjuk u bah R Nongneng bad kiwei kiwei pat ki nongkit kam jong kane ka synjuk.
Ia kane ka jingialang plie la pyniaid da u bah B N Shanpru u ba dei u vice President jong kane ka synjuk la ioh ia ka jingkren na u bah S Kharsohnoh u la pynpaw ka jingsngew kmen ia ki nong ialam jong kane ka synjuk ki ba la wan ban pynlong ia kane ka tournament ha poh jong kane ka shnong Nongumlong ha ka ba na ka liang ka shnong ka pdiang sngewbha ia kum kine ki lympung ialeh kai.
U la pynpaw ruh ba ha pdeng ka jingiaid lynti jong kane ka synjuk ban pynlong ia kane ka AS Khongphai memorial Tournament ki la mih shibun ki khynnah bad kumjuh ruh ki samla na kine ki thain jong ka Upper Shillong ki ban ioh ban ialeh kai ha ki lympung ba kham heh.
Kumta na ka liang u bah Kharsohnoh u la khmieh lynti ba ha kane ka kynti ba mynta kin sa mih shibun ki khynnah ki ban ioh ban leit ban ia shim bynta ha ki lympung ba kham heh bad kum juhruh u da kyrmen ba na kin don ki khynnah ki ban ioh ban mih khmat ia ka Jylla ruh kumjuh ha ki lympung bap he ba pher.
Ha kane ka sngi plie pyrda ia kane ka lympung la ioh ban sakhie ia ka jingia khun ka ba kham shong shit kaba long hapdeng ka Nongumlong SC pyrshah ia ka Pyrda FC, ha kaba ka Nongumlong SC ka lah ban thep da 2- 0.
Ha ba phai sha ka jingiakhun ha pdeng ka Doccan FC pyrshah ia ka Nongpiur SC, ka Nongpiur SC ka la lah ban thep da 2-0. Ha ka jingiakhun ha pdeng ka Umlyngka SC pyrshah ia ka R.I.H FC (Lumpdeng) ka Umlyngka ka la ioh ban khur ia ka jingjop da ka ba kala ioh ban thep da 1 -0 .
