Shillong, Risaw 29: Mynta ka sngi ka Confederation of Meghalaya Social Organisation (CoMSO) mynta ka sngi kila ia kynduh ia u nongialam ka liang pyrshah hapoh ka iing dorbar thawan jong ka jylla u Dr Mukul Sangma ban ia kren halor ka jingkwah jong ki ban pynkylla a ka ain Meghalaya Residence Safety and security Act 2016.
Haba kren ha ki lad pathai khubor ha dien ka jingiakynduh bad ki dkhot jong ka CoMSO, u Dr Mukul u la ong ba kaba kongsan mynta ka long ban pyntrei kam noh ia ka ain MRSSA bad ha dien kata lada don kam ban pynkylla ruh sa leh ia kaba don kam namar baroh ki ain lah ban pynkylla ia ki.
La ong ba ka ain MRSSA kaba la padiang ha ka sorkar ha ka por jong u kala biang ban iada ia ki paidbah, namar ha kane ka ain kam dei eh tang ia ki briew ba wan na sha bar hynrei ka teh lakam wat ia ki reiw sniew kiba kwah ban shong, kila don ki kyndon ha kane ka ain.
La ong ba ha ka kyndon 17 bad 18 jong ka MRSSA kila don ki kyndon ban ai bor ia ki bor shnong, kane ka dei ka phang kaba la juh kylli na ka por sha ka por. La ong ba kaei kaba kongsan ha kane ka por ka long ban pyntrei kam ia ka ain kaba la don.
Halor ka jingong ka sorkar ban sa khot ia ka jingialang jong baroh ki seng sain pyrthei halor kane ka bynta, na ka liang jong ka party Congress kan sa ai jingmut ha ka sngi ba kin ia kynduh ha kata ka jingialang.
Kaba kongsan ka long ba lah ban pynkylla ia ki rule, khlem da ktah ia ka ain, lada don kam sa leh tang ban pynbha shuwa ia ki rule kiba la don. U nongialam ka liang pyrshah u la ong ba ka ain Inner Line Permit ka don la ka jong ka jingduna.
