Shillong, Lber 12: Mynta ka sngi Central executive Committee (CEC) jong ka party HSPDP kala ia shong kyrkieh ha MLA Hostel ban ia kren ia ki kam kiba ktah ia ka jylla, naduh ka kam pud kam sam ka shong suk shong sian ha ka jylla.
U Bah KP Pangniang president jong ka party HSPDP haba kren ha ki lat pathai khubor ha dien ka jingiakynduh jong ka CEC, u la ong ba ha kane ka jingialang kila shim ia ka rai ba ia ka Para 12 (a)(b) dei ban pynkylla ha ka jaka president dei ban buhnoh ka ka ktien Governor.
Halor kane kila dep ban ai da ka jignthoh sha ka sorkar jylla, sha u myntri kampoh iing ka sorkar pdeng bad kum juh sha u Lamphang jong ka parliamentary Standing Committee na ka bynta ban pynkhlain ia ki District Council.
Haba ia dei bad ka kam pud kam sam bad ka jylla Assam u Bah Pangniang u la ong ba kam don jingmut ia ki ar ngut ki Myntri Rangbah jong ki ar tylli ki jylla ban ia kynduh lada ym pat biang ki dulir, lada iakynduh kan shu sah ka jingiakynduh bad kaba kut ka long yn sa ia kynduh biang.
Ka Party HSPDP kan dawa na kane ka sorkar ba dei ban thaw ia ka “Consultative Committee” ba kane ka kommittee kan pule bniah ia ki dulir kiba ka jylla ka don shuwa ban leit ia kynduh ia ka sorkar Assam, lada pat biang ki dulir kan shu long tang ka jingiakynduh, ka jylla kan sa dap 50 snem ka seng ka kwah ban iohi ba ka jylla kan ioh noh ia u pud u sam ba pura.
La iathuh ba naduh ba ioh ka jylla haduh mynta kila don ha duh 21 snien ka jingiakynduh ha pdeng ki myntri rangbah jong ki ar tylli ki jylla hynrei ka shukut tang ha ka jingiakren kam shym poi shaei shaei haba ia dei bad ka jingdawa ia ka Boundary Commission ka sorkar pdeng ka ong ba kin ia pynbeit hapdeng ki ar tylli ki jylla.
Ha kane ka jingialang kiwei ki rai kiba kila shim ka long ban dawa ba ia ka CAA ym dei ban pyntrei kam ha ka jylla Meghalaya, ban pynkhlain shuh shuh ia ka party kin pynlong ia ka General Council jong ka party ha ka 16 tarik Jymmang mynta usnem.
Haba ia dei bad ka ilekshon MP Rajya sabha kin kyrshan ia u Dr WR Kharlukhi bad ia ka kam CEM ha KHADC kin kyrshah ia u Bah Titosstarwell Chyne.Ha kane ka jingialang kila ia kren ruh ia ka jinglong jingman ka shong suk shong sain ha ka jylla bad kum ka party ka pynrem jur ia ki jingjia kiba la jia ha kine ki sngi.
