Shillong, Rymphang 12: Ki nong shong dukan madan ki ba shong ha shilynter ka surok bah Ryndang Briew Dam side Viewpoint ka ba hap hapoh ka jingpeit jong ka Dorbar shnong Mawlai Mawiong Rim mynta ka sngi ki la pnia nia bad ki nongialam shnong ha ryngkat bad ki bor Pulit ki ba la wan ha kaban pynsangeh ia kane ka jingwan shong die madan jong ki ha kane ka jaka.
Ha ba iakren bad u bah Sorbar L Nongpiur u ba dei u rangbah shnong jong ka Mawiong Rim u la pynpaw ba na ka liang ka Dorbar Shnong Mawïong rim ka la shim ïa ka rai ban ym shah shuh ban die dukan ïano ïano ruh ha kane ka jaka namar ba ka jingdon kine ki dukan ki pynjaboh ïa kane ka jaka jngohkai kaba paw.
U Bah Sorbar u la ong ruh ba ka jingdon ki nongdie madan ka la pynjaboh ïa kane ka jaka jngohkai pyrthei kaba don ha kane ka shnong, ba dei namar kane ba na ka liang ka Meghalaya High Court ka la pynmih syndon da ka hukum ban nym shah shuh ban die jingdie ha kane ka jaka.
U Bah Nongpiur u la ong ruh ba kine ki nongdie madan ki la wan hi ban die dukan ha kane ka jaka khlem da ioh jingbit ei ei na ka Dorbar Shnong, bad lada ki wan sha ka Dorbar shnong kum u Rangbah Shnong u kloi ban shim ki lad lynti ban wad jaka shawei ban ai lad ïa ki ba shong die jingdie.
U la ong ruh ba kum ba ka long mynta hi na ka liang ka shnong kan ym shah ïano ïano ruh ba kin wan ban die dukan ha kane ka jaka kat ba ym pat pynmih da kumwei pat ka jingbthah.
Ha ba ioh ban iakren bad kibriew ki ba shong die jingdie ha kane ka jak ana ka liang jong ki kila pynpaw ba ka jingkhang ka shnong ïa ki ban die jingdie ha kane ka jaka ka la buh ïa ki ha ka jingeh kaba khraw namar ba kim shem la ïoh shuh ban bylla naduh ba ki la shah pynsangeh.
Ki la pynpaw ruh ïa ka jingbym sngew ïa hap ïa ka rai ka Dorbar shnong ba ïa ki briew ba die jingdie mynshwa ha kane ka jaka ki ba dei na bar ka shnong Mawïongrim yn shu pynkhalai nusip. Ki la pynpaw ruh ka jingsngew diaw halor kane ka jingwan ban khang jong ka Dorbarshnong iaki ba kin shong die jingdie ha kane ka jaka ka bala long kum ka pliang ja jong ki.
