Shillong, Naiwieng 30: Mynta ka sngi ki shipai Border Security Force kila rakhe ia ka sngi seng ia kane ka kynhun shipai kaba 59th, mynta u snem ki don 14 ngut ki shipai BSF kiba la khlad ha ka jingiakhun pyrshah bad ki nongshun ban ia da ia la ka jong ka ri.
Ka long ruh ka burom na ka bynta kane ka kynhun shipai, ha kaba kila ioh baroh 119 tylli ki medal, ha ki khusnam bapher bapher, kiba la ioh ia ka Police Medal na ka bynta ki kam shlur ki long 11 ngut, Police Medal na bynta ki kam ba bha 10 ngut. Police Medal na ka bynta ki kam shlur ki long 92 ngut bad Jeevan Rakshna Padak 06 ngut.
Mynta u snem haduh ka 1 Naiwieng 2022 haduh ka 31st Risaw 2022, ki BSF kila ioh ban kurup haduh 163.325 kilo ka ksiar, la ioh kem ia ki briew 3608 ngut, ioh kurup ia ki kuli 1234 tylli, ki suloi ba bun jait 82 tylli, ka pisa thok la ioh ban kurup T. 2848500 lak tyngka, ki jingdih pynbuaid 24496.052 gram.
Ki shipai BSF kila seng ruh ia ka kynhun shipai BSF ba dei jong ki kynthei bad haduh mynta ki kynthei kiba la don ha ka kynhun shipai BSF kila don haduh 8500 ngut bad na kitei 149 ngut ki dei ha ka kyrdan ophisar, ki kynthei kila ia don bynta lang ruh ha ka kynhun niah Bike.
Ban kham pynkhlain shuh shuh ia ki lat jingiada ka kynhun shipai BSF kila sdang ruh ia ka kynhun shipai ban iada na suin, ha kaba kila ioh ia ki liengsuin helicopter Mi-17 bad haduh mynta kila don 15 tylli ki jaka hiar helicopter ha khappud Pakisatan bad Bangladesh.
