Shillong, Risaw 01: Mynta ka sngi kala don ka jignjia kaba sngewsih ha ka shnong Nongjyllieh ha kaba ar ngut ki briew kila duh ei ia la ka jong ka jingim na ka daw jong ka jingpom pyrthad, kane kala jia ha ka por kumba 2 baje eiei noh phai sngi.
U Secretary Shnong u bah Bok Nongum haba kren ha u SP News Agency lyngba ka phone la iathuh ba kane ka jingjia kaba sngewsih kala jia ha ka por slap kumba ar baje ei ei, ka kyrteng jong kine kiba khlad ki long Pyndarwel Wahlang bad u Kemorson Khyriem.
La iathuh ba kine ki ar ngut ha ka por ba la wan u slap kila leit ban rih ha kawei ka trai diengkseh bad ha kata ka por la tid u pyrkhat, ha kaba kitei ki ar ngut kila khlad noh ha shen ha kane ka jingjia kaba sngewsih.
Kat haduh ba thoh ia kane ka khubor na ka liang jong ki pulit na Nongstoin ki dang leit sha katei ka shnong ban tohkit ia kane ka jingjia bad ki dang ap ia ka kahiphot ha lalor kane ka jingjia kaba sngewsih ban pyndep ia ka rukom katkum ka ain.
