Shillong, Lber 02: U Superintendent ki pulit jong ka East Khasi Hills District u Rituraj Ravi IPS, la pyntip ba kala don ka jingia kajia ha pdeng ki shipai BSF bad ki katto katne ki briew ha ka shnong Daliya ha thain Shella kaba la pynlong ia ki BSF ba siat ha kaba u Asen M Marak u la khlad ha kane ka jingjia.
Katkum ka jingtip kaba la ioh na ki pulit la ong ba kane ka jingjia ka jngai kumba 150 meters na khappud bad ka Bangladesh, katkum ka jingtip kaba la ioh la ong ba kala don ka jingiakynad kaba la pynlong ia ki BSF ba kin hap ban siat bad ha kane ka jingjia u Asen M Marak u la khlad. Na ka liang jong ki pulit ki dang tohkit ban lap ia ka jingshisha.
Katba na ka liang jong ki BSF ha ka kyrwoh kaba kila phah ong ba ka kynhun shipai BSF na ka 110 battalion ha dien ba kila ioh ia ka jingtip ba ka don ka jingiakhaii tuh sha Bangladesh na katei ka jaka bad ki khar Bangladesh ruh ki bun ban shim ia ki mar bala phah na India.
Na ka liang ki BSF kila ong ban sangeh kane ka jingiakhaii tuh hynrei kila kyntait ban kohnguh ia kaei kaba kila bthah bad ka jingiahuri hura kala dang sniew namar ka jingwan shuh shuh ki briew kiba ym lah ban ithuh bad kila sdang ban kawang maw ia ki BSF bad ki BSF kila hap ban sympat da ki lathi.
Ki briew kiba ym lah ban tip kila dang bteng ia ka jingkawang maw ha kaba lai ngut ki shipai BSF kila mynsaw bad u wei u la mynsaw jur na ka khmat ha kaba la pynkit sha Shillong ban sumar bad ki briew bym lah ban ithuh kila dang tur sha ki BSF kaba la pynlong ban siat da ka suloi sha suin hynrei kim shym don kano kano ka jingsyier.
Ki kine ki briew kiba ym lah ban ithuh kila ialeh pynbna ban knieh ia ki tiar ialeh jong ki BSF, kumta la hap ban siat biang ha ka sien kaba ar bad ha kane ka jngsiat kala pynlong ia ki briew kiba la tur sha ki BSF kin phet na katei ka jaka ha kaba u wei briew u la khlad bad u wei u nongkhaii beain na Bangladesh ruh la mynsaw.
Ki BSF kila ong ba kane ka jaka ka dei kaba la pyndon kam da ki nongkhaii beain kum ka khaii shini bad masi , piat, kyiad bad bun ki nongkhaii beain ka jur bha na katei ka jaka na ka liang jong ki BSF kila sdang ia ka jingtohkit ban lap ia ka jingshisha.
