Shillong, Rymphang 21: Ka Zero hour notice kaba la wanrah da ka kong T S Thangkhiew MDC jong ka Mylliem halor ka jingbei pisa jong ka UCIL ban shan ia ka surok Wahkaji Mawthabah kaba la kot sha ka 36 klur. Kala wanrah ia ka jingia khluid hapdeng u Chief Executive Member jong ka KHADC u Bah PN Syiem bad u Bah HS Shylla MDC jong ka UDP ha kaba kala poi haduh u pud jong ka jingiather miet hapdeng kine ki ar ngut ki nongmih khmat.
Haba jubab ia katei ka Zero Hours kaba la ia kren hapoh jong ka iing dorbar ha kaba ki dkhot jong ka iing dorbar kiba la ia shim bynta kila dawa ban phah tohkit ha ka Central Bureau of Investigation (CBI) ban lap ia ki jingshisha baroh, u CEM u la ong ba na ka liang jong ka Executive Committee kan sa shong mynta ka sngi bad la shai ka sngi kan san wanrah da ka official Resolution hapoh jong ka iing dorbar ban shim ia ka rai ban phah tohkit sha ka CBI.
Ha kane ka jingjubab na ka liang jong u CEM u la ong “ kein noh ka jingpnah thylliej” ia kane ka kam dei ban phah tohkit “ Ai kiba ngat ai kin ngat” la ong shuh “kam dei shuh ka por ban ialehkai ia ka jaidbynriew” u bah pynshngian u la ong “ Ladei ia nga nga dang lah ban iaishah, hynrei mynta ka jaidbynriew ka don ha ka jingialeh, na ka liang jong ka MUDA, Ki British land Area, ka kam dorbar shnong, haba ia dei bad kine ki jingialeh ka Ri khasi ka dei ban ieng skhem kawei”.
Naka liang jong u CEM u la ong ruh ba ka “ District Council kam dei ka mashin shon pisa, hynrei ka dei ban iada ia ka jaidbynriew, u la ong haba siew ia ka bai khyndew balei la siew da ka pisa pliah, balei ym ai da ka cheque, ia kane ka kam hap ban phah tohkit sha ka CBI naduh kaba sndang ban lap ia ki jingshisha baroh bad katkiba don kti ai kin ngat”.
U Bah Syiem, ha ka jubab u la ong ba “u juh u briew ba soi ia ka MoU bad ka UCIL, u juh briew ba thoh sha u Jitendra Singh myntri khynnah jong ka sorkar pdeng bad dei ma u u ba la iaid lait na ka para seven jong ka Sixth Schedule bad ka Fund District Council Rule 1952” ka jingtohkit ha ka CBI ka dei ban kyntup ruh mano ba draft ia ka MoU, wat pnah thyllie” la ong u CEM.
Ha kane ka jingpynshai u Bah Syiem u la ong ba “ U CEM u long u agent jong ka UCIL, ka jaidbynriew kala ngiah, ki MDC, ki EM kintip ei ei, wat kren kai ia ka issue jaidbynriew, balie la iaid lait, wat kren kai ia ka rai u paidbah”. Bitar u CEM.
U Bah PN Syiem u la ong hapoh jong ka iing dorbar ba mynta ka jan miet yn sa khot ia ka Executive Committee ban shim ia ka rai ban wanrah la shai hapoh iing dorbar ban phah tohkit sha ka CBI ha kaba ia dei bad kane ka kynrum kynram ha kaba ia dei bad ka surok Mawthabah bad halor ka jingai soi ia ka MoU bad ka jingai NOC ia ka UCIL”.
Kiba la ia kren ha kane ka Zero Hours Notice jong ka kong T S Thangkhiew MDC na Mylliem ki long u Bah B Basaiawmoit, kum u nongsdang ia ka jingiakren ha kaba u la wanrah hapoh ka iing dorbar iaki kot ki sla kiba la ia soi ai ka MoU bad ka UCIL ha u snem 2006 bad ba la ai ia ka NOC ha u snem 2007.
Ki nongkren ha kane ka sngi, kiba kynthup ia u Bah PT Sawkmie, u ba la dawa ba dei ban phah tohkit sha ka CBI ia kane ka kam, u Bah M Nongrem, u Bah D Wallang, u Bah J Tynsong, u Bah P Syiem, u Bah M Mawsor , Bah Victor Rani, Adelbert Nongrum, Bah Latilang Kharkongor, Bah Samlin Malangniang, Bah L Blah, Ban Teinwell Dkhar, Equador Nongrang bad u Bah HS Shylla u ba la pynshai ia kaei kaba la leh ha kto ka por kum u CEM. Kine ki MDC kiba la ia shim bynta ha kane ka jingiakren baroh ki dawa ba dei ban pynduh pyndam noh ia ki jingitehkular hapdeng ka KHADC bad ka UCIL, la kadei ka Mou Lane ka ei ka NOC kaba la ai ha kip or ba mynshuwa.
