Shillong, Lber 1: U Deputy CEM ka Khasi Hills Autonomous District Council kata u bah Pynshngain N Syiem u ba dei ruh u EM ba dei peit ia ka tnad Elaka mynta ka sngi u la khot iakren ia ki ar ki Hima kata ka Sohiong bad ka shnong Jirang haka ba iadei bad ka shnad Hima jong ka Nongwah mawtyngur.
Ha ba kren sha ki ladpathai khubor na ka liang u u bah PN Syiem u la ong ba ka jingkhot ia kine ki Hima ka dei ban pynbeit ha ka ba iadei bad ka shnad Hima jongka Nongwah mawtyngur ba ha kisnem ba mynshwa ki hap hapoh ka Hima Sohiong Lyngdoh ship.
Hynrei dei ha u snem 2015 pat la aiti noh ia katei ka shnad Hima sha ka Hima Jirang ban pyniaid ia ki kam shnong kamthaw ki ba don ha ka shnad Hima Mawtyngur. Hynrei ha u Snem 2019 na ka laing ka Hima Sohiong ka kwah ban pynphai biang ia kane ka shnad hima sha ka Hima Sohiong.
U bah PN Syiem u la ong ruh baia kane ka shnad Hima la aiti tang da ki kato katne ki briew khlem ka jingmynjur lang sha ka Hima Jirang ban pyniaid ia ki kam shnong kam thaw. U la ong ruh ba kat kum ka jingkwah ka dorbar Hima Sohiong Lyngdoh Syiem ship ba ki kwah ban pynphai pat sha ka Hima Sohiong.
U la ong ruh ba ka la don ka jingai jingmut ba ki kwah ban don la u jong u khleh nong synshar khnangba ki kam kin iaid beit kin iaid ryntih na ka liang ka Council ka la nang ia thir ia kane ka bynta ha kaba kim pat shym la lah ban shim ia ka rai.
U bah PN Syiem u la ong ruh ba kin sa khot lang ia ki nong ialam jong ka Hima Jirang, ki nongialam jong ka Hima Sohiong bad kumjuh ruh ia ki nongialam jong ka shnad Hima Nongwah Mawtyngur khnang ba kin lah ban shim ia ki rai.
U la ong ruh ba kane ka jingia kynduh ba mynta ka sngi ka long tang kum ka jingpynsngew na ka liang ka Hima Sohiong. U la ong ruh ba shen ka Council kan sha khot ia kren halor kane ka bynta khamkloi namar ba kane ka Shnad hima ka dei ka baia khappud bad ka Assam khnang ban lait na ka jingia kajia khappud bad ka Assam.
Ha ba ioh ban kren bad u Acting Lyngoh jong ka Hima Sohiong u bah P Lyngdoh Thabah u la ia thuh ba ka Hima ka kwah ban pynphai pat ia katei ka shnad Hima sha ka hima Sohiong u la ong ruh ba kumba long mynta ka Hima ka ap Kyrmen ban ioh pat ia katei ka Hima.
U bah Thabah u la ong ruh ba jingduh ia katei ka Hima ka long namar ba ki don ki jingbakla ha kitei ki snem ba aiti ia ka bad u la ong ruh ba haduh mynta ki don kumba 58 tylli ki shnong ki ba don ha katei ka shnad Hima Nongwah Mawtyngur.
U bah Thabah u la ong ruh ba u sngew skhem ba kin poi sha ka thong namar ba kidon ki jingbakla ha ka jingaiti ia kane ka shnad Hima. U la ong ba ruh ba dei na duh u snem 2019 ba u la sngew thuh bakane ka dei jongka shnad ka Hima Sohiong. U la ong ruh ba na ka liang ka Hima kan pyrshang ban pynioh ha ka ban yhaw ia ki lad ki lynti ba kin ioh pat ia kane ka shnad.
