New Delhi, Nohprah 04: Hadien ka jingiasoi soskular ia suk ba dang shen hapdeng ka United National Liberation Front (UNLF), Sorkar Manipur bad Sorkar India ha ka 29 tarik Naiwieng, 2023 kumba 25 ngut ki nongialam ki dkhot jong ka National Revolutionary Front Manipur NRFM kial wan pyndem ryngkat ki tiar siat.
Kane ka kynhun kiengatiar Meitei ba ialam da u Major Boicha Vice Chief jong ka Army Staff jong ka NRFM ha ryngkat 25 tylli ki tiar ialeh ki la iasoh bad ka UNLF ha ka 2 tarik Nohprah, 2023.
Lyngba kane, bun ki dkhot jong ka kynhun ki la shim ia ka sienjam ban kyntait ia kajingiaumsnam. Kane ka sienjam kan rah shakhmat ia ki sienjam jong ka Sorkar India ban pynneh ia ka shongsukshongsain ha Manipur.
Kum ban shu kdew, ia ka NRFM ba ju tip mynshuwa kum ka United Revolutionary Front) la seng ha ka 11 tarik Nailur, 2011 da ki dkhot jong lai tylli ki kynhun jong ka KCP, ka kynhun kiengatiar Meitei.
Ki heh nongialam jong ki, ki treikam na ki ktem ba don ha ka ri ba marjan bad ki don bynta ha ki kam iaumsnam bad dawa pisa ha ki bynta bapher bapher jong ka them Manipur.
Kane ka sienjam kan pynshlur ia kiwei ki kynhun kiengatiar Meitei ban iasoh bad ka jingiasuk bad ba kin buddien ia ki jingdawa jong ki ha ka rukom kaba iahap bad ka synsharpaidbah bad ruh ka kyntiew a ka jingthmu jong ka Sorkar Modi ban don ka ‘Thain ShateiLammihngi kaba lait na ki kam kiengatiar bad kaba ioh ia ka jingriewspah’.
