Shillong, Nailar 19: U National President ka National Peoples’ Party (NPP) bad Myntri Rangbah ka Jylla Conrad K Sangma, ula kular ban pynurlong ia ki jingangnud jong ki 3 ngut ki MLA ka Congress bala wan iasoh sha ka NPP, kata ban theh ia ki kam pynroi ha ki constituency ba ki mihkhmat.
U Myntri Rangbah ula khlei ia kane ka jingkular ha ka jingialang pdiang sngewbha ia ka jingwan iasoh kine ki 3 ngut ki MLA ka Congress- u MLA ka Mawhati Bah Charles Marngar, MLA ka Nongstoin Bah Gabriel Wahlang bad MLA ka Umsning Dr Celestine Lyngdoh, kaba long hynne ka janmiet sngi Nyngkong.
U Conrad ula pyntip ruh ba kine ki lai ngut ki MLA kila wan ban iasoh sha ka NPP khlem kano kano ka jingbuh kyndon ne ka jingmyntoi shimet, ne pan shuki hynrei kila wan tang namar ka jingangnud ban iohi iala ka jong ka Constituency ba kan kiew shaphrang.
U la ong ba nga da sngewnguh eh ia ki ba kila wan khlem kano kano ka kyndon shimet la ka dei ka jingkwah pisa lane ka bor ne shuki hynrei ka dei beit thik tang namar ka jingangnud ban iohi ba ka constituency jong ki ka kiew shaphrang.
U Conrad ula kular ia u MLA ka Mawhati ba ka Sorkar jong MDA kan ai ia ka C&RD Block ia ka constituency jong u. u la ong ba nga kular ba ngan ai ka block ia ka Mawhati constituency, ngin pynkylla lut ia kaei kaba ki paidbah ki hap ban mad baroh shikatta, ngin wanrah ia ka jingkylla.
U Myntri Rangbah ula kular ruh ia u MLA ka Nongstoin ban kyntiew ia ka constituency ha ka rukom kaba ka dei ban long bad ong ki project surok kiba la iakren mynta, nga la dep pyniaid ia ka kam bad pynthikna ba kine ki kam pynroi kin sa treikam noh.
Ha ba phai sha ka Umsning constituency u Myntri Rangbah ula ong ba kane ka dei ka constituency kaba la bna kum ka jaka kaba lah ban kyntiew bha ha ka kam rep bad ka jingpynmih jingbam na ki marbam mardih bad kiwei kiwei.
U la ong ba ngi hap ban sdang pyrkhat ba kumta ka Meghalaya khamtam ka Umsning bad Mawhati kin lah ban shim kabu ia ki kam pynroi kumba la jia ha Assam.
U Myntri Rangbah u la ong ruh ba u Dr Celestine u don ia ka plan kaba khraw bha na ka bynta ka constituency bad nga kwah ban kular ia u bad ia ki briew jong u ba baroh ki plan ba phi la kren ha nga bad iakren bniah bad nga, nga ai ka jingkular ba ngin sa iatreilang ban pynurlong ia kine baroh.
Haba kyntait ia ki jingkynnoh jong u President ka MPCC Bah Vincent H Pala ba ka NPP kala pyndonkam ia ka pisa beain ban thied ia ki MLA ka party, u Conrad ula ong ba ngam kwah ban kynthoh eiei halor kine ki jingkynnoh pynthohbria hynrei kane ka rai bad ka jingsngewthuh ki MLA ka dei beit halor ki kam pynroi iala ki constituency.
U la ong ruh ba kaei kaba u President ka MPCC u ong ka dei tang ka jingsngew jong u shimet, ka bym don satia ia ka jingshisha bad kaei ka rai kaba ngi la shim ka dei beit tang halor ki kam pynroi bad ki song pynroi na ka bynta ki constituency jong kine ki MLA.
Na ka liang u State President ka NPP Bah Prestone Tynsong ula ong ngi la dap da ka jingkmen kum ka party khamtam kum u State President namar ngam ju khmih lynti ba ngin lah ban tam ia u magic number ha kane ka sngi.
Ka elekshon MP dang shen kala dep, ngi la iohi ia ki briew kila kren pyrshah bha ia ka NPP hynrei u Blei u don ia ka plan na ka bynta ka NPP wat hapdeng kiba bun ki jingtynjuh kaba ngi la iakynduh.
U la ong ruh ba kum u State President nga kwah ban pyntip sha baroh bad sha kino kino ki seng sain pyrthei ba ka jingkhang jong ngi ka dang plie ia phi ban wan iasoh, ha kano kano ka por phi lah ban wan bad iasoh bad ngi.
Kam pher phi la kren bein ne kawang maw ruh hynrei khatduh, ka kam kaba bha kaba ngi la pyrshang ha baroh kine ki snem, kala pynlong ia ki briew ban pyrkhat da kumwei ia ngi.
U pyntip ba un sa leit ban iuhkjat ha baroh lai tylli ki constituency ban iashong jingialang bad ki MLA ka Nongstoin, Umsning bad Mawhati hadien ba kut ka Dorbar jong ka Iingdorbar Thaw Ain ka Jylla.
