Shillong, Jylliew 14: Ki artylli ki Regional Committee Ka Ri-lum Jaintia bad Karbi Anglong, hynne ka sngi ki la shong jingialang ha State Convention Centre Shillong bad ki la pyntip ba kin sa aiti noh hapoh u bnai Nailar, ia ka kaiphod halor ka jingiakren pynbeit pud jong ka Psiar-Khanduli bad Block-I.
Ia kane ka jingialang la pyniaid da u Symbud Myntri ka sorkar Jylla Meghalaya u Bah Sniawbhalang Dhar kum u Chairman ka Committee na Ri-lum Jaintia bad u Myntri ka IPR, Assam Piyush Hazarika Chairman ka Committee na Karbi Anglong.
Kine ki artylli ki Committee kila iatai sani bha halor ki jaka ba iakajia bad ki la iamynjur ban pynlong da ka jingialeit jurip lang bad ki Myntri Rangbah ki aratylli ki jylla kata ka jylla Assam bad jylla Meghalaya, ka ban sa long ha ka taiew ba khatduh jong u bnai Jylliew.
Haba iakren bad ki nongthoh khubor, u Bah Sniawbhalang ula ong “Ngi la rai ba ngin sa ialeit jurip lang ia ki jaka ba iakajia bad ban iakynduh ia ki nongshongshnong ha kaba ngin sngap ia kaei kaba ki don ban pynsngew. Ngin pynbeit ia kane ka kam da ka jingiasngewthuh jingmut lang na baroh artylli ki Jylla”.
Haba kylli, u Bah Sniawbhalang ula pyntip ba ki Regional Committee ki la rai ban aiti noh ia ka kaiphod sha la ki jong ki Sorkar Jylla hapoh u bnai Nailar mynta u snem. Ban pynkloi ia kane, ngin sa ialeit jurip ia ki jaka ba don hapdeng ka jing iakajia ha ka taiew ba khatduh u Jylliew ne taiew ba nyngkong u Naitung, ha ka jingiadon ryngkat ki Myntri Rangbah na baroh ar Jylla.
U Symbud Myntri Rangbah ula pyntip ruh ba ki Regional Committee kin sa sdang noh ia ka kam ban wad ia ki lad ka lynti kumno ban lah pynbeit noh ia ki jingiakajia khappud.
“Ha ki sngi ban wan, ki dkhot jong ki Regional Committee na baroh arliang kin sa sdang ban shim rai bad kin sa pynkhreh ia ka kaiphod ha ki katto katne taiew” ula bynrap. Nalor kane, u Bah Sniawbhalang ula pyntip ba ki artylli ki border committee kim pat shim rai eiei ruh em halor ka ‘give and take policy’.
Halor ka jingdawa ki 36 shnong ka Block-I ban pynthikna ba kin wanphai sha Meghalaya, u Symbud Myntri Rangbah ula ong “Ngi khlem pat pynpaw eiei halor ki 30-40 tylli ki Shnong namar ngim pat sdang satia ia ka jingjurip.
Lehse kane kan sa mih ha ka jingialang ka ban wan. Ka Khanduli ka kham pher. Ngin peit shuwa nyngkong ia u soh uba noh shapoh”. Kine ki Regional Committee ki la rai ban sa iakynduh biang ha u bnai ban wan.
