Shillong, Lber 07: Kum ka jingbteng ia ka jing ia kynduh bad ki nongmihkhmat jong ki 88 tylli ki VEC, jong ka Laskien C&RD Block, ka Meghalaya State Planning Board ka la khot ia kitei ki VEC ban ia kren halor ki kam kiba mih na ki Central Scheme na ka Sorkar Kmie, kum ka MGNREGS, IAY, bad kiwei kiwei jong ka Sorkar, ka tnad Meghalaya State Planning Board, ka la pynlong ia ka jingiakren markhmat ‘open session/ interaction’ bad ki, Rangbah Shnong, ki Secretary Shnong, ki Nongkitkam VEC kum ki Chairman, Secretary, bad ki Women’s representatives jong 88 tylli ki Village Employment Councils (VEC) ha Laskien C&RD Block, ha ka 6 tarik March 2014 bad la ia kynduh ia ki palat 130 ngut ki nongmihkhmat jong kitei 88 tylli ki VEC kiba don hapoh u pud u sam jong ka West Jaintia Hills District, ban sngap ia ki jingai jingmut ki jingsngew jong ki halor ka jingtreikam jong ki bad khamtam ki jingeh ki jingmyntoi kiba la mih na ka scheme Mahatma Gandhi NREGS /NREGA ka scheme IAY bad kiwei kiwei.
Ha kitei ki jingialang baroh ki la pynpaw ia ka jingkmen ba ka scheme MGNREGS ka la long ka jingkyrkhuh ia ki paidbah bad ka la pynkylla dur ia baroh ki Shnong ha katei ka thain, bad baroh ki mynjur ba ka scheme MGNREGS bad ki Scheme IAY (iing baduk) kiba dei ki Scheme jong ka Sorkar Kmie (Central Scheme) ki la kyntiew ia ka rukom im jong ki paidbah, bad ba katei ka scheme ka donkam ba kan dang iai neh namar dang bun ki jingduna kiba donkam ban pyndep.
Katei ka jingialang la plie da u Bah LT Tariang, MCS, Block Development Officer, Laskien C&RD Block, ha ka jingiadonlang ki officer na ka tnad AH&VO, Agricultural /Horticultural Development Officer, bad la pyniaid ia kitei ki jingialang da u Bah. John F Kharshiing, Co-Chairman, MSPB, & Chairman, Grand Council of Chiefs of Meghalaya, ha ka jingdonlang ki Gram Sevaks bad kiwei kiwei ki officer jong ka C&RD Block.
Ha katei ka jingialang baroh ki la kyrpad ia ka Sorkar ban kyntiew bad pynthymmai ia ka bai bylla sngi, ban pynbeit thymmai ia ki dor jong ki tiar(material) namar ka jingkiew dor, ban pyllait pisa ha ka por kaba biang, ban ai lad ia ki Block ban siang rong bad pyntreikam hi ia ki Surok, ban pynjanai ia ki rukom ‘convergence’ bad la pynsngew ruh ia ka jingdonkam ban pynbeit thymmai ia ki rukom phah kam na ki tnad bapher bapher sha ki Block kaba long kaba khia ia ki nongtreikam ha Block.
Na ka liang u Co-Chairman, u la ia kynduh shwa ban sngap ia ka jingeh jong ki Gram Sevak, ban sngap bad sngewthuh ia ki jingeh kaba ki shem ha ki jingtrei jong ki bad ki la kyrpad ia ka State Planning Board ban thaw lad ban buh la ka jong ka Cadre khnang ban plie lad ia ki ha ka promotion namar kim don lad ban kiew kyrdan ha ka kam kaba ki trei. Ki la pynpaw ia ka jingeh ha kaba iadei bad ka leit ka wan namar ka jingjngai ki Shnong na kawei ka jaka sha kawei ka jaka.
U Bah John F Kharshiing, Co-Chairman, MSPB, u la ai khublei ia u BDO bad ki officer jong ki C&RD Block, bad u la kular ban rah ia ki jingeh jong ki Officer kynthup ruh ki Gram Sevaks ha khmat ka Sorkar Jylla lyngba ka report kaba ki dang pynkhreh kum shibynta ban pynjanai ia ka rukom trei kam jong ki. ha ka roi ka par. Halor ka jingdawa Civil Sub-Division, u Co-Chairman, u la ong ba un pyrshang ban iakren bad ba un sa rah ia kane ka khubor sha ki bor jong ka Sorkar Jylla.
U Bah John F Kharshiing, Co-Chairman, MSPB, u la kyntu ia ki Shnong ban pynkhreh ia ka ‘Map’ jong ka Shnong, ka khana samari jong kawei pa kawei ka Shnong, u la kyrpad ia ki Dorbar Shnong kiba don ki Law Shnong ban phah jingtip sha u BDO bad sha ka office jong u khnang ban ioh ban ia kynduh kyrpang ia kitei ki Shnong kiba don ki khlaw Shnong. U la kyntu ruh ia ki nongkitkam Shnong ban pyntip ia ka kyrteng ka jong ki President bad Secretary jong ki Dorbar Kur ne Seng Kur.
Nalor ki Rangbah Shnong, ki nongmihkhmat jong ki 88 tylli ki VEC ka C&RD Block Laskien kiwei kiba la ia kren ha katei ka jingialang ki long i Bah C Lyngdoh, Dolloi Elaka Raliang, uba la ai ka jingkren ai khublei.(SP News)
