Jowai, Lber 22: Namar ka jingbymbiang ka jingioh bording hapoh ka elaka Narpuh, KaKSU Narpuh Circle , ha ka 19 tarik mynta u Bnai, hapoh ka jingialam u General secretary, Bah Kwilness Suchiang, lem bad ki dkhot jong ka ki la leit ia kynduh ia u SDO MeECL EJHD(Khliehriat). Ka seng ka la pynpaw ia ka jingsngewkhia halor ka jingthud palat ka bording sha ki
thain Narpuh. Lyngba ki jingthoh kiba biang, ka seng ka la kyntu ia ka
ophis ban pynbiang bording ia kine ki thain. Ki shnong kiba shah ktah
bha ki long naduh Brichyrnot, Tongsengshaduh Umkiang bad Ratacherra.
Katba ka jingsiew(bill) pat ki wan thik thik la kut bnai wat hapdeng
ka jingbymbiang halor ka jingai bording.
Ka seng ruh ka la dawa na ka ophis ban thung uwei u Lineman namar ym
pat don uwei ruh ban peit ia kat ka thain Narpuh kaba naduh Tongseng,
Sonapyrdi bad shaduh Ratacherra namar kane ka pynsuk ia ki paitbah
haba don bun ki jingthud halor ka bording. Na ka liang u sahep u la
ong, ba u la dep buh ka jingythoh sha kiba halor jong u ban pynioh 3
ne 4 ngut ki lineman sha kine ki thain.
Ka seng ruh ka la pynpaw ha u SDO halor ki katti katne ki Post ba la
jan kyllon bad don ruh kiba la jan dkut ki sainar ba la sarang bad
kyntu ia ka ophis ba kan shimkhia kloi khnang ban lait na ki jingjia
kiba sngewsih bad shimruh ia ki lad ban ker ia ki sainar kiba la jan
dkut kiba la pyniaid napoh shnong hapoh ka elaka. Hynrei u sahep, u la
ong ba ka ophis ka ka mut leh kumta tangba ym don tiar ba la pynioh
sha ki ban leh ia katei ka jingdonkam bad u la kular ban leh kloi ia
kine ki jingdonkam baroh.
“Ka seng kan leit kynduh bad ai ia kajuh ka jingdawa na u Chairman
MeECL. Wat la ka seng kam ioh ban ia kren halor ka jingkiew kynsan ka
bai bording, na ka liang ka seng KSU Narpuh Circle ka pynpaw ia ka
jingpyrshah jur ka jong ka ia ka sorkar halor kane ka jingle thrmur ka
jong ka ban pynkiew ia ka bai bording. Kane ka long thik kumba ot na
pdot ia u kup bad sem shiliang. Ka seng ka la kyntu ia ki bor bahalor
ban pyrkhat arsien ia kane”, la pynpaw u Bah Kwilness suchiang,
General secretary ka KSU Narpuh Circle.(SP News)
