Shillong, Nailar 04: U Additional Director ka kynhun shipai Border Security Force (BSF) Kolkatta u Ravi Gandhi ha ka jingwan jong ka jong u ia ka jylla Meghalaya saw sngi lynter u la leit sha khappud bad ka Bangladesh ban ia kynduh ia ki shipai kiba don ha khappud.
Ha kane ka jingwan jngoh ia ki khappud la khot ruh ia ka jingialang ban ia kren ia ka jinglong jingman jong ki khappud ha ki thian mih ngi ba dei jong ka Eastern Command ban peit ba ki kam ki jam kin iaid beit ha kaba ia dei bad ka jingiada ha khappud bad ka Bangladesh.
U ADG u la ban jur ba ka jingpahara ha khappud bad ka Bangladesh ka dei ban long kaba phikir bha wat ha pdeng ki jingeh kaba ki ia kynduh namar ka jylla Meghalaya la tip ia ka jingslap kaba juh long hynniew bnai lynter man u snem, hynrei ha pdeng kine ki jingeh kila trei ban iada ia u pud u sam.
Ha ka jingleit ka jong u ADG sha Garo Hills la leit sha khappud bad ka Bangladesh ha kaba la synran lang ia u da u Superintendent ki Pulit bad Deputy Commissioner jong ka West Garo Hills District ryngkat bad ki ophisar jong ki BSF bad kala don ka jingialang ban ia kren ban don ka jingiajan ha pdeng ki pulit bad ki BSF.
Ki BSF kin pyndon kam noh ia ki kor ki bor ban ban peitngor ia ka khappud bad ka Bangladesh bad ban pyndon kam ia ki tiar kiba katkum kane ka juk kaba mynta ban pynkhlain ia ka jingphara ha khpappud ban khanglad ia kki kam beain bad ka jingwan rung beain.
U ADG u la pnypaw ba ki briew jong ka jylla Meghalaya ki dei kiba pyrshah ia ka jingwan rung beain ki briew na shiliang khappud namar ki sngewthuh ba kane kan ktah ia ka ioh ka kot jong ki paidbah bad ki briew kane ka jylla ki kut jingmut ban ialeh pyrshah ia ka jingwanrung beain ki briew na bar ri.
U ADG u la ai ruh ka jingiaroh ia ki Komander kiba don ha khappud bad kiba la trei shitom ban iada na ka jingwan rungtuh ki briew na Bangladesh bad ki BSF kila kut jingmut ban iada ia u pud u sam jong ka ri ha khappud.
