Jowai, Iaiong 21: Ka Meghalaya State Planning Board, ha ka jingialam jong u Salseng C Marak, MLA, Chairman, MSPB, ha ka jingiadonlang ryngkat u Prof RC Laloo, Deputy Chief Minister bad Chairman, District Planning Development Council, DPDC, West Jaintia Hills District, u Bah Rowell Lyngdoh, MLA, Co-Chairman, MSPB, u Bah Lakmen Rymbui, Co-Chairman, MSPB, u Bah John F Kharshiing, Co-Chairman, MSPB, u Fersen Momin, Co-Chairman, Dr Manash Das Gupta, Dy Chairman, Dr Eureka Lyngdoh, Dy-Chairman, u Grithalson Areng, Dy Chairman, u Shri. Polycarp Marak, Dy Chairman, u Shri. R. Rapthap, IAS, Deputy Commissioner, u Shri. D Wahlang, MCS, Addl Deputy Commissioner, West Jaintia Hills District, bad kiwei kiwei ki officer ka State Planning Board, ki la lum ia ka District Planning Development Council, WJHD.
Ha katei ka jingialang la ioh ban bishar bniah ia ki tnad, PWD, PHE, Agriculture, Horticulture, Education, Forest, Soil Conservation, Health, Urban Affairs, Sports, Home (Police), JHADC, Disaster Management, Border, Sericulture, Tourism, C&RD –DRDA, Power (MePDCL), bad kiwei kiwei, halor ka jingmang tyngka bad ka jingpyntreikam ia katei ka bhah tyngka ba la mang kyrpang sha ki tnad bapher bapher jong ka Sorkar Jylla.
Na la kaiphod na ka tnad ka Agriculture bad Horticulture, la pynsngew ba ki pynlong ia ki awareness program kiba bun ban wanrah ia ka jingsngewthuh ha ki nongrep halor ka thong jong ka sorkar ban pynkylla ia ka ka rukom rep bad jingpyndonkam sboh na ka Chemical Fertiliser sha ka jylla kaba dei baroh Organic Fertiliser, ki Officer kane ka tnad ki la ong ba ha kane ka bynta ka ki paidbah nongrep kiba bun ki la sdang sngewthuh ia kane ka phang bad ki la kyntu ia ka Sorkar Jylla lyngba ka MSPB ban pyrkhat kumno ban leh namar katba ka tnad Agriculture kam ai sboh dawai shuh ki sboh dawai kiba khleh dawai kitei ki jait sboh pat ki bun shapoh dukan iew ha kaba ki dang bun ki paidbah nongrep ki dang iai pyndonkam kaba long kaba ktah bha ia ka koit ka khia ha ka jylla baroh kawei.
Ki la ong ba la donkam ban pynkiew ia ka bha sboh kiba la shna da ka Organic, lane compost. Ki tnad Agriculture ki la pynpaw ia ka jingdonkam ban buh ia ki dukan Agriculture ban die ia ki symbai kum shibynta ban plie lad ia ki paidbah ban ioh kham bun ia kitei ki symbai. Ki la pynpaw ba bun ki nongrep bad khamtam ki paidbah nongthied ki la sdang jingsngewthuh ia ka kaba jingdonkam ban sangeh ia ka jingthied ia ki mar rep kiba la pyndonkam da ki dawai chemical.
Ha katei ka jingialang, haba bishar ia ka jingpyntreikam ia ka scheme Megh Health Insurance Scheme, (MHIS), hapoh West Jaintia Hills District, la shem ba ha ka Phase-1 la don kumba 23,465 (54.85%) tylli ki long iing kiba la pynrung kyrteng, na ka 42,774 ha kaba ka la kynthup 86,820, ngut ki paidbah, bad ha ka Phase-2 la don kumba 42,579 (62.35%) tylli ki long iing kiba la pynrung kyrteng, na ka 68,286 ha kaba la kynthup 1,57,542 ngut ki paidbah. Ha kaba iadei bad kane ka kam ka MSPB ka la kyntu ia ki officer ba kin shim khia ban pynsngewthuh ia ki paidbah ba kin kynmaw ban leit buh kyrteng ynda la pynthymai ia ka MHIS lyngba ka Phase-3, kaban sdang hashen, kum shi bynta ba kin ioh ka jingmyntoi ha ka koit ka khia kaba la plie da ka Sorkar Jylla na ka bynta baroh ki nongshong shnong.
Shuh shuh ha kaba bishar ia ka tnad bording – Power (MePDCL), la shem ba ka West Jaintia Hills District ka donkam baroh kumba 22.o MW, bad ki don kumba 32,660 kiba pyndon kam ia ka bor ding lane ne ki iing kiba la shim bording bad kaba kyndit ka long ba kumba 13,064 ngut ki long kiba dang pynsah teng lane kiba khlem siew shuh ia ka bai light, kynthup ia kiba siew slem ia ka bai bording. Na ka tnad PWD (Building) ki la pyntip ba ka jingtei ia ka Hospital khyllung Maternity and Child Hospital ki la jan dep bad ka sah sa tang khyndiat ba kin aiti noh sha ka Health Department.
Ha kaba phai pat sha ka tnad Fisheries ha ka kam ri Dohkha, la ioh jingtip ba ka jingdonkam dohkha hapoh West Jaintia Hills ka long kumba 1770 MT shisnem, bad lyngba ka thong jong ka Sorkar Jylla la lah ban pynmih 480 MT ka Dohkha na ki pung ri jingri ha ka shi snem kaba mut ka jingduna dohkha hapoh ka District ka long haduh 1362 MT, shisnem, kumba long haduh kine ki sngi kaba bun ka dohkha ka wan na sha ri thor jyllaAndhra Pradesh, ha ki synduk thah bad ka shim por haduh 18 lane 21 sngi ban poi sha Shillong. Ha kane ka liang ka MSPB ka la pynsngew ba kan sa ai jingmut ia ka Sorkar Jylla ban kham shim khia halor kane ka phang khnang ban plie lad ia ki paidbah ba kin ioh ban thied da ki dohkha kiba im, lane ba kin long kiba dang shu dep tong na ki pung dohkha.
Haba bishar ia ka tnad PWD bad C&RD, ki dkhot jong ka MSPB ki la pynpaw ia ka jingkyrmen haba ki la lah ban shna san tylli ki surok shnong lyngba ka jingia sngewthuh lang (convergence), ka jingtreikam hapdeng ka PWD bad ka MGNREGS – C&RD, ha ka juh ka por na ka liang ka MSPB ki la kyntu jur ia ki officer ba kin shim khia ban peit khmih ia ka rukom(quality) shna surok khnang ba kan nym don ka jingtrei kaba torti, bad khnang ba u paidbah un ioh ia ka leit ka wan kaba kham suk. Ka tnad PWD ki la ai ruh ia ka kaiphod halor ki jingtrei surok kiba bun.
Ha katei ka jingialang, u Shri SC Marak, Chairman, MSPB, u la kyntu ia ki officer sorkar hapoh ka district ban iarap ia ki paidbah kiba duk kiba shitom bad u la ai khublei ia baroh kiba la ai jingmut kumno ban nang pynkyntiew ia ki kam baroh lyngba ka jingpynbiang ka jong ki ia ki kaiphod (detail report), ha kaba ka MSPB kan sa pynlong ka jingbishar bniah bad phah ia lah ka kaiphod hashen halor ka DPDC sha ka Sorkar Jylla.
