Shillong, Lber 13: Ka 1st Nongkynrih FCA – Inter Kur Knockout Football Tournament ka la sdang por 2.30 jamiet ha 12 tarik March 2022, ha Madan Nongkynrih, kaba don hapoh Shnong Madan Lyngdoh, Raid Nongkynrih, Hima Khyrim, ha kaba la plie da u kongsan u Paiem Dr Balajied S Syiem, Syiem Hima Khyrim, ha ka jingiadon ki ar ngut ki symbud kongsan u Bah John F Kharshiing, Adviser & Spokesperson, Federation of Khasi States.
U Bah H F Khongsit, u Asst Commissioner, barim ba la shong thait na ka tnad Transport jylla Meghalaya bad u Bah P Nongsteng, Rangbah Shnong, Madan Lyngdoh. Na ka liang u Bah Dester Nongsteng, President, Nongkynrih Football Club Association, ha kaba pyniaid ia katei ka tournament kur ha shwa ban sdang u la khot ia u Symbud kongsan u Bah John F Kharshiing, uba la dei u rangbah uba la sdang ia kane ka jingialeh football kur naduh 2015 ban ai jingkren sha ki paidbah bad ki samla kiba la ia don lang.
Ha ka jingkren u Bah John F Kharshiing, Adviser & Spokesperson, Federation of Khasi States, u la ai khublei ia u President bad ki dkhot ka Nongkynrih FCA, u la ai khublei ia u Kongsan Paiem Dr Balajied S Syiem, Syiem Hima Khyrim, bad ia u Bah H Khongsit, u officer uba la shongthait bad u rangbah treimon sngewbha ha kine ki thain, bad ia u Myntri Mylliem, bad ia baroh kiba la shim ia kane ka sien jam kaba nyngkong ban pynlong ia ka 1st Nongkynrih Inter Kur Football Kur hapoh Raid Nongkynrih
U Bah John u la pynpaw ia ka jingkmen ban ia don lang ha kane ka jingplie bad u la ong ba lada shim ia ka jingpynlong ia kane ka football kur hapoh Hima Khyrim kane kan long kaba SAW namar la dep pynlong teng lai sien 2015, 2016, 2017 ha Smit bad lehse kane kan long kaba SAW bad u la ong ba u dang shu ia kren ha kine ki sngi bad i Paiem Dr Balajied S Syiem kumno ban bteng ia kane ka jingiakynduh ki samla kur lyngba ka Football Kur bad u la ong ba hashen un sa lum ia ka jingialang jong ka Dorbar Ki Khlieh Nongsynshar ban ioh ban bteng ia kane ka kam.
U la ong ba kane ka jingmih ki samla kur ka paw ba ka synshar tynrai ka dang khlain bad ka dang im naduh tynrai namar ka synshar khaddar hapoh ka Ri Khasi ka long kaba shong nongrim ha ka jinglong kaba kyrpang ha kaba ngi shim jait na ka kmie bad ia kaba ym don hapoh Ri India bad ba kane ka jinglong ka pynlong ia ngi kum ka jaidbynriew kaba kyrpang, u la shim ruh ia ka lad ban pule ia baroh ki 36 tylli ki jingialehkai kiba ka jylla Meghalaya ka hap ban pynkhreh na ka bynta ka National Games.
U la ai khublei ia ka Sorkar Meghalaya kaba la pynbna ia ka Meghalaya Sports Policy ha ka 12 December 2019, ha kaba ki jingkular ha ka Sports Policy 12 Dec 2019 ki long kiba ai mynsiem ia baroh ki samla bad khamtam ia ki kmie ki kpa namar mynta ka don ka lynti kumno ban iohkam ioh jam lada ki samla jong ngi ki jop Medal ha ki National, CommonWealth, Asian, World Championships bad khamtam ha ka Olympics.
U la kyntu ia baroh ki Sports Club ban pule bniah bad ban ai jingshai sha ki para samla ba kin tip shai. U la kitbok ia ki 30 tylli ki Kur bad khamtam ia ki ar kur Nongrum bad Marbaniang kiba ia kynduh ha kane ka jingsdang.
Na ka liang u Kongsan u Paiem Dr Balajied S Syiem, Syiem Hima Khyrim, haba kren u la ai khublei ia ki dkhot jong ka Nongkynrih FCA kiba la pynlong ia ka football kur bad u la ai khublei kyrpang ia u Bah Dester Nongsteng, President, Nongkynrih FCA uba la maitlynti ban pynlong ia kane ka Football Kur, u Paiem u la ai khublei ruh ia u Bah John F Kharshiing uba ialam ia ki Khlieh Nongsynshar uba la sdang ia kane ka football kur ha u snem 2015 ha Smit bad u la kyntu ia u Bah John F Kharshiing, Adviser & Sporkesperson, ban lum jingialang ban ioh ban ia kren kumno ban pyntyllun ia ka kam shakhmat.
U Paiem U la ai khublei ruh ia u Myntri Mylliem Bah H Khongsit, u officer Sorkar uba la shongthait, ia ka jingiadonlan ban ai mynsiem ia kane ka jingiakynduh ki Kur lyngba ka Football Kur, u Paiem u la ai khublei ruh ia u Bah P Nongsteng, Rangbah Shnong, Madan Lyngdoh, bad u la ong ba ka jingiatylli ka jingiaithuh ka jingiatip kur tip kha ka la khie im biang na kane ka jingiakynduh ki Kur lyngba ka Football Kur.
U Paiem u la ong ba la seng Shnong, Raid bad Hima da ki Kur bad kine ki kur ki don ka bynta kaba kyrpang ha la ki jong ki jong ki Hima bad ka long kaba donkam ia ki ban nym klet ia la ki jong ki jingkitkhlieh bad u ong ba kane ka Riti Dustur kaba ngi don hangne ha Ri Khasi ka long kaba kyrpang bad la donkam ia ngi ban bat ia la ka nongrim tynrai khnang ba nym bakla ki longdien.
U Paiem Dr Balajied S Syiem, Syiem Hima Khyrim u la ai khublei ia baroh ki rangbah kur bad ki 32 tylli ki jait samla kur kiba la wan shakhmat ban ia shim bynta ha kane ka jingialehkai football kur kaba nyngkong ba pynlong da ka Nongkynrih FCA bad u la kitbok ia baroh ki nongiashim bynta.
Ha kane ka sngi plie ka jingialeh ki kur ka la long hapdeng ka Kur Nongrum pyrshah ia ka Kur Marbaniang ha kaba u Kenold Marbaniang (jersey-6) u la thep goal ha ka minute 28 bad u Sebastian Nongrum (jersey -11) u la pynphai da kaba thep goal ha ka minute 54, bad hadien ka jingiakhun kaba mar ryngkat u Hopefulness Marbaniang (jersey-9) ha ka minute 64. Kane ka jingialeh ka la long kaba ia ksaid bha hynrei ki Kur Marbaniang ki la lah ban pynneh ia kane ka jingtam jong ki haduh ba kut ka por.
Ki 32 tylli ki jait kur kiba ia shim bynta ki long 1) Nongrum, 2) Marbaniang, 3) Langstieh, 4) Mylliem, 5)Khongwet, 6)Kharumnuid, 7)Kurkalang, 8)Tariang, 9)Khongshun, 10)Kurbah, 11)Majaw, 12)Myrthong, 13)Nongkynrih-A, 14)Khongtani, 15)Khonglah, 16)Tham, 17) Nongdhar 18) Khongjoh 19)Khongsni 20)Rynjah 21) Rynjah-B 22) Nongkynrih 23) Kharkongor 24) Khyriem 25) Lyngdoh Mawphlang 26) Pyngrope 27) Nongspung 28) Khongwir 29) Nongsteng 30) Khongsti 31) Warlarpih 32) Lyngkhoi baroh long 30 tylli ki jait kur hangne ka Kur Nongkynrih bad Kur Rynjah ki la pynmih ar kynhun ka A bad B.
