Shillong, Oct 07: Mynta ka sngi ka jingialang jong ka kabinet haba ia dei bad ka kaiphot kaba la wanrah da ka “High Level Committee” bad ha kane ka jingialang kala don ruh ka jingbatai bniah ha kaba ia dei bad ka kaiphot ha kaba ia dei bad ka phang jong ka “Sweeper Colony”.
Haba kren ha ki lat pathai khubor u myntri rangbah ka jylla u Cornad K Sangma u la ong ba ha kane ka jingialang kaba la long mynta ka sngi la batai bin pa bin naduh kaba sdang jong kane ka jaka bad kiei ki jingeh kiba ia kynduh bad ki jingjia kiba la long na ka por sha ka por bad ia kine baroh la batai ha kane ka jingialang.
Katkum katei ka kaiphot, ki don lai tylli ki jingai jingmut, ka jingai jingmut kaba nyngkong ka long halor ka jinglong trai ia ka jaka, kumba phi tip ba ka don ka jingbymshai na baroh ki liang mano ba long trai ia kane ka jaka bad mano ba don ia ki dulir bad ba dei trai halor ka khyndew.
Ha ka kaiphot kaba la wanrah da ka kommittee kala peit bniah ba ka jingiasoi ia ka soskular bad ban shim ia kane ka jaka da ka sorkar jylla bad ka Municipal Board na u syiem jong ka Hima Mylliem bad kane ka jingpynkhreh kala sdang la ia soi ruh ia ka soskular.
Ka jingpynkhreh ban pyndep ban ia soi ia ka soskular ban shimti ia kane ka jaka dei ban pyndep hapoh ka shitaiew, kane ka jingiasoi soskular kan long ha ki lai kynhun, ka ophis u Syiem ka Hima Mylliem, ka sorkar jylla kaba dei ka tnad pynroi sor bad ka Shillong Municipal Board, kane ka dei ka jingai jingmut kaba nyngkong bad ia kane dei ban pyndep ha ka taiew ban wan.
Ka jingai mut kaba ar ka long ban pynkynriah ia ka ophis jong ka Shillong Municipal na Bishop Cotton Road ha kaba ki don ki iing sah sha kawei ka jaka baba shipor kaba don mar pyrshah bad ka ophis barim jong ka MBDA bad ia kane ruh la dep ban ai jingbit bad ka ophis jong ka Municipal bad ban pynkynriah noh na kito ki iing bala shna ban pynlong iing sah.
Kawei pat ka jingai jingmut ban plie ka lat na ka bynta ban pynkynriah ia ki nongtrei jong ka Shillong Municipal kiba shong ha sweeper colony mynta ban pynsah ia ki sha kito ki iing kiba la dep ban shna kiba don ha Bishop Cotton Road.
Kiwei pat ki nongtrei kiba trei ha kiwei ki tnad sorkar kiba kumba 57 tylli ki tnum iing, kuba 50% na kitei kila dep ban mih na katei ka jaka bad kila leit sha ki jaka bapher bapher bad la rai ban kyntu ia kito kiba dang sah ba kin mih na Sweeper Colony bad ba kin leit sah sha ki jaka ba ki tnad sorkar ba ki trei kin ai jaka.
Ka jingai jingmut kaba lai, ka long ba ka tnad pynroi sor ba kan pynkhreh ka jaka kaba thymmai ban ai jaka sah ia kiwei kiba dang don ha katei ka jaka, haba ia dei bad kane la bthah ia ka tnad pynroi sor ba kan pynkhreh ia ka jingai jingmut bad ban wan rah sha ka kabinet.
Ka jingai jingmut kaba saw ka long ba ha dien ba la ioh ia ka jingai jingmut ka cabinet kan sa shong pyrkhat, kuba ka long mynta ynda la soi ia ka soskular katei ka jaka kan sa long trai da ka tnad pynroi sor bad ka Municipal Board bad ha dien ba la shim ia ka jaka bad ka tnad pynroi sor kan saw at jaka na ka bynta kito ki bym dei ki nongtrei ka Municipal Board bad kan ai jingmut sha ka sorkar kumno ban leh ia katta.
Ban pynkynriah ia ki briew ki don ki kyndon bad hap ban bud ia katkum ki kyndon kumta ka tnad pynroi sor kan pynkhreh ia kine kiei kiei baroh bad kan sa wan rah biang sha ka kabinet, lada ka don kata ka “Status Quo” ka sorkar kan ialeh pyrshahia kata lada ka don, kane ka dei ka jingeh kaba la bun bun snem dei na kane ka daw ka shimpor.
Ka dei ka sien kaba nyngkong ba ka sorkar ha ka jingshisha kala shim khia ia kane ka kam bad ka sorkar kala pyrshang ban wat ia ki lat ki lynti ban weng ia kane ka jingeh da ka jingia mynjur lang, kane kam dei ka kam kaba suk, ka jingbym lah ban leh kloi, wat ka long kumno kumno ka sorkar kala shim ia ki lat ki lynti ban pynkynriah bad kane kam shim por khyndiat.
Ia kito kiba shong beain, ka don ka rukom kumno ban pynkynriah ia kito ki briew kiba shong beain, ia mynta ym pat lah ban ong ei ei namar ba ym dang shimti ia katei ka jaka bad ka HLC kala ai jingmut ban but katkum ki kyndon, la ong u myntri rangbah.
