Shillong, Naitung 26: Ka Status Quo hapdeng ki Ar Sorkar kam dei ban long ka jingtim ïa u Paid ka Bri u Hynñiewtrep kiba shong ba sah ha khappud. Mynta ka sngi kata ka 26tarik Naitung 2021 kala don ka jing thombor da ki bor pulit jong ka Assam haki thaiñ khappud ha Iongkhuli kaba dang hap hapoh Ri Bhoi District.
Na ka liang ka KSU North Khasi Hills District Unit ka pynpaw ïaka jingbitar bad bym lah shah ïa kum kine ki jingleh jong ka sorkar Assam haki thaiñ khappud jong ka Ri Khasi.Kane ka dei ka jingmlien jong ka sorkar Assam ban leh ia kine ki kam buid poh ban mushlai ha khappud.
Ka sorkar Assam kajuh mlieh ban tam pud bad mushlia ïaki jaka khappud ha them Ri- Bhoi kiba la ju jia manla ka por kala pyn bitar shi katdei eh ïaki nongshong shnong jong ka Them Ri Bhoi bad ïaka Jylla hi baroh kawei ha kaba ki bor pulit jong ka Assam kila nud wat ban ktah kti kat ïa u Nongmihkhmat paidbah u MDC jong ka Mawhati Constituency kata ïa u Bah Charles Marngar.
Kane kala pynlong ïaka KSU jong ka NKHD Unit ban bitar shuh shuh ka dei hadien ba ki pulit Assam kila wan ban pyn sangeh kynsan ïaka jingthung post electric ha Iongkhuli Ri-Bhoi District kaba dang dei ka jaka ba pura jong ka Meghalaya da kaba pynshisha ruh kum ki kam lynti dewbilat kiba la shna daka scheme MGNREG.
Ka Sorkar Assam lyngba ki bor pulit jong ka kila wan leh donbor bad thombor da kaba pyn donkam ruh ïaki Paidbah na Assam kiba wan buhai shnong haki shnong Khasi kiba don sha khappud na ka bynta ka jingkwah jong ki ban klun jubor ïa ki jaka ki puta haki thain khappud.
Kane kam dei ka sien nyngkong namar ka jingmlien jong ka sorkar Assam ban knieh jubor ïaki jaka sha ki thaiñ khanapara Raid Marwet,Raid Nongtung Block II) Balakhwa Hima Nongspung, Hima Jirang kumta terter kiba dei ki jaka kiba hap ha Ri-Bhoi District bad sha ki thaiñ Jaintia Hills District kiba kynthup ïaki shnong Langpangap,Khanduli bad Sahsniang bad ha kiwei kiwei ruh ki District.
Ki paidbah jong ka Jylla ki kynduh jingeh na ka por sha ka por tang namar ba ki bor sorkar jong ka Meghalaya ki long ki ñiangkohnguh ïaka sorkar Assam kim nud ban saham bad shimkhia namar ki shu riehtngen tang ha kata ka Status Qou katba ki paidbah jong ngi ki dang sohsat bad im syier bad rit Mynsiem.
La ïohi shai man ka por ki bor District Administration bad ki bor pulit ka Assam kim kheiñ snep ïaki bor sorkar ka Meghalaya taka daw ka pynlong ïaki paidbah jong ngi ba shong haki jaka khappud ban shu shah ñion beiñ ha baroh ki liang lada ngi phai sha ka roi ka par ne ka shongsuk shongsain kila shu shah iehnoh bein bad shu sha pynbiej ha kita ki lei san snem ba shu bang ktien tang hashwa ka elekshon.
Kumta na ka por sha por naka liang ka Seng ka ju ïakynduh ïaki bor Sorkar ban dawa ba dei ban buh ïaki Police Out Post sha ki thaiñ khappud ha kaba wat naka liang ka Hima bad ka Dorbar Shnong ki long kiba kloi ban ai sngewbha ïaka jaka ban tei ïaki Out Post ha ki jaka khappud.
Hynrei kaba sngewsih naka liang jong ka Sorkar kam ju shimkhia ïa kaei ba ka Seng bad ki Paidbah kiba shong haki khappud ki ju ai jingmut. Lada kan ïai jia kumne ka por kam slem shuh ban poi sha u pud ban ïa umsnam lada ka sorkar Meghalaya ka dang sngap mynthi ïaki jingeh jong ki paidbah thaiñ khappud ki ïa kynduh bad kan ym slem ba kan jia kumba la jia haki khappud jong ka Nagaland bad Mizoram.
Lyngba kane ka kyrwoh U Samla Ferdynald.K.Kharkamni President KSU NKHD Unit u la kyntu ïaki bor District bad ïa ka Sorkar Maghalaya ban shimkhia mardor ban pynbeit ia u pud sam bad ban pynbiang ïaka shongsuk shongsaiñ bad ka bit ka biang jong ki para doh para snam kiba shong basah sha ki thaiñ khappud ym ban shu kut tang haka jingïakren bad pynlong langkñia pat ïaki paidbah ba shong basah ha ki thaiñ khappud.
