Shillong,iaiong 21: U Chief Excutive Members (CEM) jong ka Khasi Hills Autonomous District Council ( KHADC),u bah Titostarwell Chyne, ha dien ba u la leit ban jurip ia ka Iewduh ban khynra trading license ka ba 20 tarik iaiong 2023, u la iathuh ba ki don bun bha ki ba bar jylla ki bym don ia ka Trading license, ki don ruh ki dukan kiba dang thymmai ki bym pat don ia ka trading license.
U CEM ,u la iathuh ruh ba ki don pat kiba la shong slem kiba la don ia ka trading license kiba biang bad ki wan ban pynthymmai ruh ia ka trading license ka jong ki manla ka por.
Naka Liang u CEM, u la buh ruh ka jingkyntu ia u syiem jong ka hima Mylliem ba um dei shuh ban ai ia ka non objection certificate ( NOC) ia kito ki non tribal kiba plie hi ia ki dukan ki jong ki khlem da pyndep shuwa ban ioh ia ka trading license bad dei ban pynduh beit ia ki, ia ka NOC.
U CEM u la ong ba ka la don kawei shithi ba poi sha u, Na kawei ka seng kaba la tip kum ka Meghalaya Greater Shillong Progressive Hawker and Street Vendor Association, kaba dei ka seng jong ki nong shongdie madan, ha kaba la soi kyrteng ruh da ki ar ngut ki nongialam jong katei ka seng kata i kong S Thabah bad i kong Biolin Pyrtuh.
Ha kaba la kynnoh ba u CEM u la pynkheiñ ia ka court order, ha ba iadei bad ka jingleit kyndang ia kiba shong die madan da ki bor jong ka KHADC. Na ka liang jong u bah Titostarwell Chyne u la pynshai, ba ka ka jing leit kyndang jong ki ka dei ia kito kiba shong die madan, ki bym don laisen, la ki shong ha madan ne ha dukan, haba kim don ia ka trading laisen ka konsil kan beh beit.
Haba iadei pat bad kito kiba shong die jing die ha ki madan u bah Titostarwell Chyne u la iathu ba ka konsil kam don bor, hynrei ki dei ki bor pyniaid distrik ban peit ia kito ki nong shong die madan.U bah Titostarwell Chyne u la buh jingkylli ia kane ka seng, Hato ka kwah ban iada ia ki briew kiba nabar ne ia ki briew lajong…?
U la iathuh ba ka konsil hi ka pyndonkam ia ka aiñ kaba la don lypa, ki bar jylla la ki shong ha madan ne dukan ruh lada kim don ka Trading license kim lah ban buh dukan, kata ka dei kaba ki hap ban sngewthuh, la ong u bah Chyne.
U bah Titostarwell Chyne, u la shim ruh ba kane ka jing phah jingthoh jong kane ka seng, ka long ka bym don nongrim bad kam don jingiadei ei ruh em bad kata ka court order, namar ka court order ka khlem ong ban ia shong katba mon bad leh katba mon, hynrei hap bud ryntih ia ki aiñ kiba la don lupa, u la iathuh.
