Shillong, Lber 19: U Symbut Myntri rangbah ka jylla u bah Prestone Tynsong ba dei peit ia ka tnad Labour haba jubab ia ka mat iakren hapoh iing dorbar kaba la wanrah da u bah Process T Sawkmie ha ka “Zero Hours” halor ka phang ban register ia ki nongbylla ba wan na sha bar la ong ba baroh kiba wanrah nongtrei na shabar hap ban register bad ka tnad Labour.
U bah Prestone u la kren shai ba ym don kam jingbit na ki District Council ban register ia kiba wan bylla sha Meghalaya katkum ka ain kaba la shna da ka sorkar jylla, hynrei ki ba wan trei bylla kin nym lah ban trei khlem da register bad ka Tnad Labour katkum ka ain.
Ka tnad Labour kala dep ban thung ia ki inspector ha baroh 39 tylli ki block kiba don ha ka jylla bad na ka bynta kito ki block ba dang shu thaw thymmai dang pan jingbit na ka sorkar ban thung ia ki Inspector sha kito kiblock ruh kum juh.
Ia ki nongtrei kiba wan na sha bar ka jylla la register na ka bynta 179 sngi bad 30 sngi shuwa ban kut ka por ki trai nongaikam kiba ki hap ban pynthymmai ban register na ka bynta jong ki nongtrei bad ka bai registerka long T.50 tyngka marwei.
U Symbut Myntri Rangbah u la ong ba ka ain kala kren shai ba ki nongbylla ki hap ban register bad ka tnad Labour bad kim don kam shuh ban register ne shim jingbit na ki District Council, ka sorkar kala dep ban plie ia ka website ba ki nong bylla ki lah ban apply online bad ki lah ban pyndap ia ki phom ruh.
