Shillong, Iaong 18: U Chief Electroral Officer ka Jylla u Dr BDR Tiwari mynta ka sngi ka 18 tarik u Iaiong 2024 kata shi sngi shwa ba ki paidbah ka Jylla kin ia mih ban thep ia ka vote jong ki na ka bynta ban jied ia u ne ka MP ban mih khmat ia ka jylla sha dorbar bah Parliament sha Lok Sabha, hakaba ka jingthep vote kan sdang na duh ka por 7 baje Mynstep bad kan kut pat ha por 4 baje jan miet.
Ha kren ha ki lat pathai khubor na ka liang u CEO u Dr BDR Tiwari u la ong ba hapoh ka Jylla Meghalaya ki don ar tylli ki seat kata ka 1-Shillong (ST) Parliamentary Seat bad ka 2- Tura(ST) Parliamentary Seat, ka Shillong seat kaba don haduh 36 tylli ki Assembly Constituency bad ka Tura kaba don 24 Tylli ki Assembly Constituency.
U la ong ruh ba ki don 10 ngut ki kyrtong kiba ia khun ia kane ka election ha ka ba 6 ngut ki kyrtong ki ban ia khun na ka Shillong Parliamentary Seat katba 4 ngut pat na ka Tura Parliamentary Seat. Ka jingdon jong ki nongthep vote hapoh ka Jylla ki don baroh 22,26,567 ngut ha kaba 10,99,517 ngut ki dei ki shynrang, 11,27,047 ngut ki kynthei bad 3 ngut ki third Gender.
Ha kane ka kynti ba mynta ki don kumba 31,247 ngut ki samla kiba dei ha ka sien ba nyngkon ban thep vote. U CEO u la ong ruh ba ki don 326 tylli ki polling station ki ba ha ki jaka sor bad 3186 ki ba don haki jaka Nongkyndong.
U la pyntip ruh ba ka Nongspung ka ba hap hapoh ka Rambrai Jyrngam Constituency ka don ia ki nong thep vote haduh 1274 ngut ki briew ka ba dei ruh kaba don ia ka jingbun ki Voters bad ka Kamsingh ba ha Amlarem bad ka Photeitsim ka ba ha Ranikor ka ba don ia ka jingduna ha ka jingdon ki Voters da 36 ngut.
Ha ba phai sha ka jingiar jong ki Constituency ka Mawshynrut ka dei ka ba iartam bad ka West Shillong Constituency ka dei ka Constituency ka ba khamrit ha ka jingiar ka jong ka. kataba ka jingdon jong ki Electors ka Dalu constiruency ka dei ka ba duna tamda 22398.
Ki Electors kat ba ka Mawlai constituency ka dei ka ba buntam da 50953 ki electors.U Dr. BDR Tiwari u la pyntip ruh ba baroh 40 pyrton ki kynhun iada ki la poi ha ka Jylla ha ka ba 26 Pyrton Ki CRPF, 6 pyrton ki BSF, 4 pyrton ki SSB bad 4 Pyrton ki RPF.
