Shillong, Rymphang 28:Ha ka jingialang kaba la long mynta ka sngi ha poh Shillong press club haba kren haki nong thoh khubor u la ong U President ka Goalpara District Truck Owner’s Association (GDTOA) u Raizuddin Ahmed u la ong ba kum ka seng hi baroh kawei kam kyrshan satia ia kata ka rai kaba la khang ban iaid ia ki trok kit dewiong bad kumjuh ruh ki trok kit umphniang, da uta u Abul Kalam Hussain uba la shu kam President ha ryngkat ki paralok jong u.
U Raizuddin u la ong ba ka GDTOA kam dei satia ka seng kaba la ialam da uta u Abul Kalam naba u la dei u briew uba la dep ban shah weng na ka seng halor ka jingialeh pyrshah ia ki kyndon jong ka seng, ha kaba la weng ia ki naduh ka 22 tarik Naiwieng, 2012. U la pynshai paidbah ruh ba ka jingkam jong u Abul Kalam Hussain ba u dei u President ka long kaba bakla bad ba ka kynhun kaba la ialam da u Hussain ka dei kaba la shu thaw be-aiñ bad kaba dei tang ka kam rhah bor ban ioh jingmyntoi shimet.
U Raizuddin u la ong ruh ba ka seng ha ka 22 tarik Naiwieng jong u 2012 lyngba ka jingialang jong baroh ki dkhot ki la pynthymmai ia ki nongkitkam bad hadien kane, ka seng ka la weng noh shipor ia ki dkhot ba kynthup ia u Nausad Ali, Abul Kalam Hussain, Abdul Rahim bad kiwei hadien ba ki la iaid lait na ki kyndon ka seng.
Hynrei kaba sngewsih ka long ba ha ka 19 tarik Nohprah 2013, ki katto katne ki briew ha ryngkat bad kitei kiba shah weng na ka seng ki la thaw ia ka committee be-aiñ hapoh ka jingialam u Abul Kalam bad ban pynpaw pat ba ki dei ki nongialam jong ka GDTOA bad halor kane, la dep ruh ban ujor sha ka ïingbishar, ha kaba ka jingbishar ka dang iaid haduh mynta.
Ha kaba iadei pat bad ka jingkam jong u Abul Kamal ia ka jingdon jong ki khyrdop khrong khajna be-aiñ ha shi lynter ka surok bah NH-62, u Raizuddin u la kubur ba ka long kaba shisha ba ki don ki khyrdop kiba la shu ieng be-aiñ. U la ong, watla ki iakhun ia kajuh ka mat, kata ban kyntu ia ka sorkar Meghalaya ban weng noh mardor ia ki khyrdop ba la pynieng be-aiñ, hynrei kim kyrshan satia pat ia kata ka jingiakhih da kaba khang iaid ia ki trok ym tang kito kiba kit dewiong hynrei wat kiba kit umphniang, ha kaba ki la ialeh ban khang lad ia kane bad la ong ba watla ka don ka jingiakhih, hynrei ia mynta kumba 40 bad 50 tylli ki trok ki dang iaid ha ka shi sngi.(Sp News)
