Shillong, Lber 15: Ki pulit jong ka East Jaintia Hills District ha ka jingap ktem kila ioh ban bat ia kawei ka kali Maruti bad haba la talasi ia kane ka kali ha Ladrymbai la ioh ban kurup drok Heroin ba shong dor T.32 lak tyngka.
Kane ka jingioh ban bat ia katei ka kali ka long ha ka por mynstep mynta ka sngi, na kane ka kali la ioh ban kurup T.54 hajar tyngka ka pisa, lai tylli ki phone la kem ruh lai ngut ki briew kiba don ha kane ka kali.
Ki pulit jong ka East Jaintia Hills kila long kiba peitngor baroh 24 kynta man ka sngi ba pynthikna ba ki nongkhaii drok kin nym ioh lat ban pyniaid iew ia kine ki jingdih ba sniew kiba ktah ia kalawei jong ki khun samla ka jylla.
