Shillong, Nailar 12: Ki pulit jong ka East Khasi Hills District kila trei shitom kumno ban ia khun pyrshah ia ki nongshallan drok, ha ka step sngi u Blei ki pulit kila ioh ban kurup haduh 80 synduk ki synduk sabon kiba la thep ia u drok bala tip kum u Heroin na ka Bus kaba wan na Manipur.
Ka Superintendent jong ki pulit ka East Khasi Hills District ka kong Claudia A Lyngwa kala iathuh ba ka jingkhia jong u drok bala ioh ban kurup kala kot sha ka 930 gram bad kane ka dei ka jingioh kem kaba heh tam haduh mynta bad ka dor jong u ha iew kala kot sha ka T.4.5 klur tyngka.
Ia u ne u Heroin la ioh kem na kawei ka thei samla kaba la tip kyrteng kum ka Veineithem Hookip kaba dang 25 snem ka rta kaba la thep ha ki lai tylli ki synduk. Na ka liang jong ki pulit kila kem ruh ia ka Bus namar kane ka bus kala don ka jaka thep ia kine ki jingdih ba siew ha ka jaka kaba la shna kyrpang.
La iathuh ba na ka liang jong u Director General jong ki pulit ka jylla Meghalaya ha ka jingialang kaba la long dangshen ha Manipur u la kren ia kane bad na ka tnad pulit kan kren ia kane ka juh ka phang ha ka jingialang kaban sa long shen ha Shillong.
Na ka liang jong kane ka heh pulit jong ka East Khasi Hills kala iathuh ba ka jingikren bad ki doktor, lada kane ka jingdih drok ha kane ka nongbah Shillong kan dang ia beteng kumne 50% na ki samla hapoh kine ki lai snem ban wan kin sa bun ki ban kylla Sombi.
Kala kyntu iaki balang, ki shnong ki thaw bad ki seng bapher bapher ba kin shim khia ia kane khamtam ki kmie ki kpa ban tehlakam ia la ki jong ki khun namar tang ki pulit kin nym lah ban leh ei ei lada kamdon ka jngiatreilang.
Haka juh ka por la kyntu ia ki seng bhalang ki shnong haba ki don jingtip eiei sha phang ki nongdie drok, kim dei ban kem da lade bat ia ki bad pyntip sha ki pulit namar lada ki kem ka mukotduma ka iap noh.
