Shillong, Jylliew 12: U President ka Meghalaya EMRI Worker’s Union, u bah Roipar Kharaswai bad u General Secretary, u bah Ebenezer Mawlong, ki la phah da ka jingthoh sha u Myntri ka koit ka khiah na ka bynta ban pyntreikam biang ia ki kali kit nongpang 108 hapoh ka jylla Meghalaya.
Ha katei ka jingthoh, ki nongtrei ka 108 ha Meghalaya kiba hap hapoh ka jingpeit jong ka Meghalaya EMRI Worker’s Union ki la dawa ban pyntreikam biang ia ka 108 bad ban shimti noh da ka sorkar ym ha ka kompeni.
Ki la ong ruh ba naduh ba dang sdang kane ka kam ha u 2008, kane ka kam ba ki trei ka la iarap shibun ia ki paidbah, khamtam ha ka por kyrkieh bad kane ka la pynneh shkhem ia ka rukom treikam ka koit ka khiah ha kane ka jylla Meghalaya.
Ka la dei ka por ban aiti noh ia kane sha ka sorkar ba kan peit ban ia kaba peit ka kompeni, ha kaba kila ong ruh ba ha ka por ba peit ka GVK, la don bun ki jingeh, kum ka jingbym biang ka jaka treikam, slem ban phah shna ia kine ki kali haba ki sniew, ka jingduna ki nongtrei bad kiwei kiwei bad ym tang ba kine ki kali kim lah ban pynbiang iaki paidbah hynrei ka la pynduh jingkyrmen iaki.
Ki la kyrpad na ka sorkar ba kan pynlong da ka jingialang katba kloi bad ban ai jingkular ha kaban pynbiang ia ka rukom treikam. Lada ka sorkar ka pynslem ia kane ka jingkyrpad, kan sa ktah iaki paidbah bad ki nongtrei bad lada ka sorkar ka sngap mynthi, kin pynpaw iaka jingpyrshah jong ki lyngba ki lad iakhun kiba laitluid bad synshar da ka ain.
