Shillong, Rymphang 12: Ka Federation Of Khasi Jaintia and Garo People Nartiang Unit mynta ka sngi ka lan ban ia kyndynduh ia ka Myntri ka Koit ka Khiah ka Kong Ampareen Lyngdoh ban iakren halor ka jingdon kam byn kyntiew kyrdan noh ia ka PHC Nartiang sha ka Community Health Center bad kumjuh ruh ban pynbiang ia ki Doctor bad ki Nurse ba pura ha kane ka Hospital.
Ha kane ka dorkhas ba la ai sha ka Myntri na ka liang ka seng ka la pynpaw ba ia kane ka PHC la shna ha ka snem 1950 bad la kyntiew kyrdan ia ka sha ka PHC ha u snem 2001.
Ha ba iakren bad u bah Bin Raliang u ba dei u nongïalam ka seng FKJGP Nartiang Unit u la kyntu ia ka Dr M Ampareen ka ba dei ka Myntri ka Koit ka Khiah ban kyntiew kyrdan noh ïa ka Nartiang PHC sha ka CHC lane ban pynbiang da ki Doctor ki nurse ba pura.
U la ong ruh ba naduh ba la kyntiew kyrdan sha ka PHC ha u snem 2001 ki la don bun ki jingduna kiba la pyndkhot ïa ka jingai jingsumar sha ki nongshong shnong.
U bah Raliang ula ïathuh ba ha kane ka jingiakynduh na ka liang ka Myntri ka la kular ban shimkhia da ka ba shen kan sa phah ïa ki ophisar ka DMHO ban leit jurip ïa kane ka PHC khnang ba ka sorkar kan leh ïa kaba donkam.
Ha ba bynrap halor kane ka jingia kynduh bad ka Myntri na ka liang u Bah Kitboklang Nongphlang u ba dei u nongïalam ka FKJGP Central Body, u la ong ba kane ka jaka sumar ka la shakri ïa ki paidbah kane ka thaiñ la 70 snem mynta bad hadien ba la pynkiew sha ka PHC don bun ki jingdkoh ha ka rukom trei kam na ka jingbym don ki nongsumar.
U la dawa ruh na ka sorkar ba kadei ban shim khia ïa kane ka jingdawa namar ba kane ka jaka sumar ka dei kaba donkam tam na ka bynta ki nongshong shnong kane ka thaiñ, namar mynta kane ka PHC kam pat long kaba biang wad tang ban sumar ïa ki longkmie kiba ïoh khyllung ruh bad bun na ki longkmie ki hap ban leit shaduh Ialong ban kha khun.
Kum ban shu pyntip ba Kumba ka long mynta kane ka PHC ka dei kaba ai ka jingshakri sha ki 34 tylli ki shnong, kiba ym palat ïa ka 37,000 tam ki nongshong shnong, hynrei ka jingbym don ki Doctor ki Nurse ki ba pura ka wanrah jingeh ïa ki nongshong shnong ha kane ka thaiñ.
