Shillong, Jylliew 16: Ka Khasi Students’ Union (KSU) Nongtyngur Unit ha kaba nyngkong eh ka pynpaw ia ka jingsngewkhia kaba khraw eh halor ka jingbym kheiñ snep ki Company ban pynbiang ïa ka Network sha ki 5 tylli ki Shnong kiba kynthup ïa ka shnong Nongtyngur, Nongkyndah, Lumwahñiai, Ri-Massar bad Nongeitñiang.
Haba ia dei bad kane ka seng kala dep ban buh ia ka jingujor sha ki kompany pynbiang network ha kine ki bnai ba ladep, hynrei haduh mynta ruh naka liang jong ki kompany kim pat pyni dak ei ei ruh.
Ha ka jingiakren bad u wei na ki nongtrei jong kawei ka company pynbiang network, kata ka dei ka Company Reliance Jio bad la iathuh ba ka jingbym biang network ka dei namar ka jingthut bad ka jingsniew ki bynta jong u tower.
Hynrei kaba phylla ka long kumno wat hadien la bun bun ki bnai bala jingujor ruh, ka company kam pat lah ban bujli ïa ki tiar ki tar kiba la sniew bad ka jingkylli ka mih, hato kita ki tiar ki tar ki dei kiba wanrah naduh na Ri phareng kaba pynlong ia ki ban slem eh ban wan ne ka jingbym kwah shuh kane ka company ban shakri ia ki paidbah ha ki thain nongkyndong.
Ha ka juh ka por, ka seng ka la leit jurip bunsien sha ki jaka ba don u network tower bad haba kylli na ki nongap pahara. Watla ka company ka don la ki nongap pahara ia ki network tower, hynrei kaba shem jingeh ka long ba kine ki nongap kim shym la shong la sah hangne bad ia ka Gate ruh ki shu ieh ryngheng bad khlem da khang tala bad ngim shym la iohlad ban iakynduh markhmat.
Hynrei ha ka jingiaipyrshang ban wad jingtip, u nongap pahara u la ai daw ba ki jingeh kiba mih na tei u tower ha Nongkyndah ka long naka jingbym don Electricity bad don ruh ki tiar ki tar kiba la sniew da ki snem.
Ha kaba iadei bad kane, ka seng kala kylli pyrthew ba hato na ka liang ki nongtrei ka Company kiba dei khmih ïa u tei u Tower ki ju shimkhia ne em ban wan jurip bad ban maramot ïa ki Tower ba la sinew? U la iathuh ruh ba ki nongtrei ka Company ba kim ju wan ban peit wat tang shisien ruh wat hadien shi snem ba la sinew.
Halor kane ka jingeh, ki paidbah khamtam ki Samla pule jong kane ka thaiñ ki la sngew syrtok bad khuslai sah khamtam ha kum kane ka por kaba ki pynlong class lyngba ka juk jingstad ka internet.
Shuh shuh na ka liang ki nongialam ka seng KSU ki lah ïoh ban pyntip la bunsien lyngba ka phone calls sha ki nongtrei ka Company bad ka seng ka lah dep phah ruh ïa ka shithi ban ujor hynrei kaba sngewsih pat ka long ba na ka liang ki nongtrei kitei ki Company ki shu ai daw bara bor da kumne kumtai.
Haduh kat kine ki sngi ruh u tei u Network tower um shym lah satia ban ai ka jingshakri kaba myntoi ïa ki paidbah hynrei ka Company ka lah shu bamklop ei da ki snem ki snem ïa ki Customers jong kitei ki 5 Shnong.
Ka KSU Nongtyngur Unit halor katei ka jingeh ki paidbah ka thaiñ khamtam ki Samla pule bapher bapher kiba dang don ka jingshaniah kaba shitylli tyllon ha ka Digital Online systems namar ka jingiaid shakhmat ka jingpule jong ki lyngba ki Online Classes.
Kaba donkam hakhmat eh ïa ka jingiarap ki Internet bad kumjuh ki nongshong shnong baroh kiba donkam ban tip bniah ïa ki jingpynbna na ka sorkar ha kum kane ka por ba dang ktah jur u khniang jingpang COVID-19.
