Shillong, Nailur 28: Ki nongshong shnong jong ka shnong Nongthymai Lumthangding kiba hap hapoh jong ka Elaka Laitlyngkot mynta ka sngi ki la leit ban ia bah Pynshngian lang Syiem Deputy CEM jong ka KHADC halor ki jingeh ki paidbah nongshong shnong namar bym don rangbah shnong.
Haba kren ha ki lat pathai khubor mynta ka sngi ha Shillong Press Club u bah Tarcisius Dkhar u la pynpaw ia ka jingsngewsih ba ki paidbah nongshong shnong kila ia kynduh jingeh mynta la shisnem tam na ka jingbym don Rang bah shnong ba pura jong ki.
U bah Dkhar u la ong ba ka jingbym don rangbah shnong kala buh ia ki paidbah nongshong shnong ha ka jingeh ia ki jingdonkam kiba lam la ka sngi bad kane kala wanrah ia ka jingbym ia sngewthuh shuh hapoh shnong pohthaw.
La ong ba kala wan rah ia ka jingbym shongsuk shongsain, ka khuid ka suba ha shnong ha thaw bad wat ha ka jingdon kam ha ki kot ki slakum ki syrnod na ka shnong bad kiwei kiwei ki jingdon kam .
Ha ka ba iadei bad ka jingbym ioh jong ki ia u Rang bah Shnong mynta la shisnem tam ki la pynpawba ka daw ka dei na ka jingbym shim khia u Sordar ka Elaka Laitlyngkot u bah Alenson Shabong wat ha dien ba la ioh ka jingthoh na ka liang ka District Council.
U bah Tarcisius Dkhar uba dei u Rangbah Shnong u ba mynshwa u la pynpaw ba u la ioh ban wan iakynduh la bun sien ia u bah Totos Chyne u ba long u CEM ka KHADC ha ki por ba la dep kim shym la lah ban pynlong ia ka jingjied ia u Rangbah Shnong.
Hynrei ha kine ki khyndiat sngi kila ioh pat ka lad ban ia kynduh ia u Deputy CEM ka KHADC u Bah Pynshngain N Syiem bad ki la ioh ruh ka jingkular ba ha kine ki khyndiat sngi kin saphah da ka jingthoh sha u Sordar ka Elaka Laitlyngkot u bah Alenson Shabong ban pynlon gia ka jingjied ia u Rangbah Shnong ba Pura jong ka shnong.
