Shillong, Jymmang 10: Ka Khasi Student Union West Khasi Hills District ha ryngkat ki nongshynshar shnong jong ka dong ka thaiñ Wahkaji ki la leit ban iakynduh ia u AT Mandal u ba long u myntri ka sorkar jylla ban buh ka jingkyrpad ban pynioh ia kawei ka block ha Wahkaji lane ha Umdohlun.
U wei na ki sordar shnong jong ka shnong Rangkhiat na kitei ki dong ki thaiñ u ba la wan ban synran ha kane ka sngi ba leit ban iakynduh bad aiti ia ka dorkhas ban kyrpad ban pynioh noh ia ka jingkwah bad ka jingdonkam ha katei ka dong ka thain, ha kaba ki paitbah ki la mat jingeh baroh shi katta u la pynpaw.
Ki briew ki ba shong ba sah na kitei ki thaiñ ki shem jingshitom shibun ban iaid kjat ban leit haba donkam sha block kaba don mynta shaduh Ranikor, ha kaba don ki shnong ki ba jngai bad shimpor kumba 2 bad haduh 3 kynta bad ka jingjngai ba 18 ne 19km ban poi sha Ranikor block.
Kumjuh ruh kum ka thaiñ Warsanlyngdoh kiba hap ha Mawkyrwat ka long ka ba shitom eh ia ki namar ka jiingjngai ka la long 50km tam eiei. Kane ka la long ka jingeh ka ba khraw ia ki paitbah.
Halor kine ki jingeh ka synjuh ki nongshynshar shnong ryngkat ka KSU SOUTH WEST KHASI HILLS DISTRICT la shim kawei ka rai ban dawa ban ioh noh ia kawei ka block ha kitei ki thain ban pynsuk bad kan long ka jingiarap kaba khraw.
Shuh shuh la bynrap u samla Forward Nongrem u ba long kum u President ka Khasi Student Union West Khasi Hills District, kane ka jingkwah na ka liang jongki ka dei kaba la iaid myn ha ki snem ki ba la dep, ha kaba yn kynthup kumba 44 tylli ki shnong ki ban hap ha kata ka block kaba ki dawa la ka dei ha Umdohlun lane ha Wahkaji.
Halor kane ka mat ba ki la iakynduh na ka liang u myntri ba dei peit, u la jubab ba, un nym kular eiei halor kane hynrei u la ai ka jingkular ban pynpoi ia kane ka mat ha ka miej jong u myntri rangbah ka jylla u Conrad K Sangma kumjuh ruh ha ka ophis u DC ban bthah ban peit bniah ia ki jingdonkam ban lah ban pynioh ia ka block ba thymmai.
