Shillong, Jymmang 30:Ka KSU South West Khasi Hills District hynne ka sngi hapoh ka jingialam u samla Forwardman Nongrem ki la leit iakynduh ia ka Dr. F.V Kharshiing kaba dei ka Director of Health Services ( MI) ban iakren halor ki mat ba iadei bad ka koit ka khiah ha South West Khasi Hills District bad hapoh Mawsynram C&RD Block East Khasi Hills District.
Ha kane ka jingiakynduh ka KSU ka la ban jur halor ka jingthungkam shipor ia palat 50 ngut hapoh ka Civil Hospital Mawkyrwat khlem da pyllait iaka Advertisement ne khlem da khot iaka interview hashwa ban thep iaki ha ki post bapher bapher.
Ka KSU lyngba ka jingthoh ba la phah sha kane ka Director ka la sngewkhia jur halor kane ka thungkam thungjam khlem da iaid iaki kyndon ba la buh ha kaba ka la pynduh jingshaniah iaki samla thepkam thepjam napoh ka District.
Ka seng ha kane ka jingiakynduh ka la dawa naka Director ba ka dei ban shimkhia bad pynbeit halor kane ka mat thungkam thungjam hashwa ba ka seng kan shim da kiwei pat ki sienjam .
” Ngi kyntu iaka ophis ba ka dei ban pynbeit halor kane ka bynta da kaba pyllait advertisements bad khot interview khnang ba ki samla kin ioh iaka lad ban iakhun iaka interview “.
Ka seng KSU ka kyntu iaka sorkar ba ka dei ban phah noh ia baroh ki post shaka DSC ne MPSC ym ban buhrieh ia ki ha kane ka Civil Hospital khnang ba ka DSC ne ka MPSC kan ioh leh ia kaba donkam ban pyllait advertisements bad khot interview khnang ba ki samla kiba dei hok ban iohkam kin ioh rung kum ki nongtrei hapoh ka Civil Hospital.
Naka liang ka Director of Health Services ( MI) ka la kular haka seng ba kan bthah ia u District Medical and Health Officer South West Khasi Hills District ba ki dei ba u dei ban disclose ia baroh ki post ha kane ka Hospital shaka DSC ne MPSC khnang ba kine ki tnad thungkam thungjam kin ioh ban thung Pura noh iaki nongtrei da kaba pyndam noh iaki nongtrei kiba rung na kyrpong ing ( backdoor appointment).
Ha kane ka sngi, ka seng ka la ioh ban rah ruh sa kiwei ki mat bad kita ki long, Ban pynbha bad maramot iaka Mawsynram PHC, Ban pynsted ban pyntrei iaka Jyllep bad Mawhiang Sub Centre ia kaba la phah ban ioh ia ka jingmynjur ban mang tyngka lyngba ka PMABHIM .
Ban kyntiew iaka Ranikor CHC sha ka First Referral Unit ( FRU) CHC da kaba pynbiang ruh ia u Pharmacist ba thikna bad ka X ray machine hapoh kane ka CHC. Ban pynsted haba iadei bad ka Pediatric ward hapoh Civil Hospital Mawkyrwat Kane ka dei ka kyrwoh na u samla Forwardman Nongrem, President KSU South West Khasi Hills District.
