Kynduh ka KSU ia kiba ha iing ka u Paul B Makri ba shah sait iap 35 snem mynshuwa

Shillong, Jylliew 17: Ka KSU Western Border Area ha ryngkat ki dkhot ka KSU Umrit Unit kiba hap hapoh ka jylli treikam ka KSU North Khasi Hills District Unit ki la leit ban ia kynduh bad pyntngen ia ki bahaiing bahasem u Paul B Makri bamkwai ha dwar u blei ha shnong Umrit mynta ka sngi ka 17 tarik u Jylliew 2022.

Da kaba kyrtiang biang sha ka mynnor, 35 snem mynshwa ha u snem 1987 ha ka por ba dang khluit bha ka jingiakhih Anti-Foreigners’ Movement hapoh jylla, ka la don ka jingsynreit kuli pathar jong ki pulit CRPF ia ki samla Khasi bad ia ki iing Khasi ha u bnai Jylliew khamtam ha ki thaiƱ Motphran, Mission Compound, Mawkhar, Jaiaw, Umsohsun, Wahingdoh bad Riatsamthiah.

Kane ka jingiakynad ka la khih phaloh bha ha ka 15, 16 bad 17 tarik u Jylliew ha kaba da ki phew ngut ki dkhot ka KSU ki la shah siat bad mynsaw jur. U president ka KSU ha kato ka por u (L) Bah Bull N Lyngdoh ruh u la shah tied dusmon ha ki pulit bad shah set along.

Ha ka 17 tarik u Jylliew, u samla Paul Biswal Makri uba dei u KSU volunteer u la shah siat na khlieh ha ki thaiƱ Motphran bad u la kyllon iap ha shen. Ryngkat bad u sa uwei pat u samla u la iap ha kaba u kuli sorkar u la ksam lyngba ka iing jong u bad dung prak ia u.

Kane ka jingiap u Paul Makri ka la pynkhih win ia ka Jaidbynriew bad ka jingiakhih kaba jur bha ka la bteng haduh 1 snem kynthih. U samla Paul Makri ha kane ka por ba u shah siat iap u dang 19 snem ka rta bad u dang don hapdeng ki jingpule skul ha Government Boys Secondary School bad Karate (white belt) ha YMCA. La kha ia u ha ka shnong Umrit ha Ri Bhoi bad ha Shillong u sah wai ha Jaiaw.

Ki paidbah kiba iathuh khana ki ong ba la don ba kyntu ia u samla Paul ba un phet noh na ka jaka ia khih haduh ar sien namar ba ki pulit CRPF ki la synreit kuli pathar ia ki paidbah, hynrei u Paul Makri u la pyneh triang bad iai bteng ban ia don bynta bad ki para dkhot ka KSU kiba dang ia khih ha Motphran tad haduh un da shah siat bad shah kit ka met sha Civil Hospital. La tep donburom ia u Paul Makri ha lum jingtep Katholik ha Mawprem.

Ka KSU lyngba kane ka kyrwoh ka pynsngew sha ki poiei bad ka sorkar ba ki bun ki dkhot ka seng ki la long martyr ha ka jingialeh bad kiba mynta ruh ki dang pahuh kiba kloi ban aiti ia lade na ka bynta ka dawbah ka Jaidbynriew tad haduh ba ka Ri Khasi kan khuid phar na ki mynder buhai shnong.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet