Shillong, Jymmang 7:Ka Confederation of Ri Bhoi People (CoRP) Jirang Circle ka la leit jurip dang shen ha ka thain Rani Jirang khappud bad ka Assam halor ka jingjyllei ki parmaw bad ki kor tyllait maw be-ain kiba la pynjot bad pynjulor ia ki lum ki wah kaba la ishyrkhei bad bun ki lum ki la madan na ka jingtih khyndew bad tih maw ha katei ka thain.
Ka seng hapoh ka jingialam President ka CoRP-Jirang Circle bah OS Lyngdoh lem bad kiwei ki dkhot ka la lap ba kitei ki par maw bad ki kor tyllait maw ki dei kiba la pyntrei da ki dkhar ha kyrteng jong ki Khasi, kaba long pyrshah ia ka Benami Transaction (Prohibition) Amendment Act, 2016 ka sorkar jylla.
Na ka liang ka CORP ka pyrshah jur halor kane ka jingtih maw bad khyndew pathar hapoh ka hima Jirang da ki Khasi kiba leh Benami ban ai lad ia ki briew na bar ban kamai spah bad pynjot ia ka mariang.
Kane ka jingtrei benami ka long khamtam katei ka dei ka jaka ha khappud bad ka jylla Assam ha jaka ban pynneh pynsah ia ka khyndew ka shyiap hynrei la shu die lilam lut da ki bor pyniaid hima khlem pyrkhat shuh ia ka lawei ki khun ban wan.
Ha kajuh ka por, ka CoRP ka dawa ia ka sorkar jylla ban pyntreikam ia ka Benami Act 2016 bad ban pynshitom ia ki briew kiba donkti ban khaii benami ha ka kam tih khyndew bad maw ha Rani Jirang, namar ka long kumba ai lad ia ka Assam ban khlun ia ki jaka khappud ka jylla Meghalaya.
U la iathuh ha ka jingshisha ka ophis jong ka Forest bad ka District Council kiba dei ban peit ia ki khlaw ki btap ne ka jingtih maw ki don ha Rani Jirang, hynrei ka long kaba lyngngoh ba kitei ki ophis kim shym leh eiei bad kane ka pynsuba sniew ba ka lah ban don eiei ha lyndet ba ioh katba mon ban kit maw ne kit hyndew khamtam ha ki por mynmiet ba kynjah briew.
U Bah Lyngdoh u la ong na ka liang ka seng kan sa leit ban ujor halor kane sha ki bor sorkar bad sha ka District Council bad ka kyntu ruh ia ki rangbah shnong ka thain ban ym ai lad pathar ia ki dkhar ban tih maw bad khyndew.
