Shillong, Nailar 19: Ka KSU South West Khasi Hills District ka la kynnoh ba ka jingkulmar jong ka jingthung iaki Contractual Post na bynta ki Asst. Teacher haki Government Schools ka dei namar ka jing bymdon jong ka Tnad Pule puthi jongka Jylla iaki procedures thungkam kiba biang bad kiba khuid ba suba.
Kaei kaba jia ha ophis jong u Sub-Divisional Schoool Education Officers , Mawkyrwat haba iadei bad ka jingthung nonghikai contractual post ha Rngikseh Government LP School ka pyni shai iaka jing fail jongka Sorkar haka rukom thungkam thungjam. Kum ka Seng, ngi sngewsih jur halor kine ki jingjia ha kaba ki la mih ki jingjia kiba ktah mationg iaka Jaitbynriew ha kaba khlempep ka la mih ka jingpharia iaka Jaitbynriew khasi tang namar ka rukom thungkam kam shym long kaba khuid bad ba suba.
Kumba long baroh shi katta, ka tnad Pule Puthi jongka Sorkar Jylla ka la shu thung ia ki nonghikai contract khlem da pyllait advertisement bad conduct ia ka interview kumba leh ha kiba bun ki department jong ka sorkar hapoh jongka District. Bunsien la shu thung la thung iaki briew kiba la ioh iaka jingmynjur na ki School Managing Committee ne ki Headmasters bad Headmistress.
Kane ka buh jingeh shikatdei eh iaki samla wad kam wad jam namar ki samla ba tbit bad ba dei hok ban ioh kin nym ioh lada ki SMC ne Headmaster bad Headmistres kim approve iaki. Kaba kum kane ka rukom thung kam ka dei ka rukom thungkam bym hok bad ka rukom thungkam ka bym shym la iaid haka lynti kaba dei kaban pynhun iaki samla wadkam wad jam.
Ym tang katta, katba kum ka kaiphod RTI ba la ioh da ka seng na office jong u SDSEO,Mawkyrwat la lap ba nalor ba ka rukom thungkam ha ki post Asst. Teacher la shu thung sop sop khlem ka jingpynbna paitbah lyngba ki advertisement, ka Office jong u Director of School Education & Literacy ka la thung ruh iaki nonghikai khlem da bud katba kum ka NCTE Norms.
Katba kum ka NCTE Norms kaba la treikam naduh ka 23rd August.2010, ki nonghikai kiban shah thungkam ki dei ban long kiba la pass iaka HSSLC bad ioh 45% bad ym tang katta, ki dei ban pyndep iaka 2 snem Diploma in Elementary Education (D.EL.Ed) ne 4 snem Bachelor in Elementary Education (B.EE) ne 2 year Diploma in Education (Special Education ) . Kaei ba ngi lap ha South West Khasi Hills District ka long ba u Director of School Education & Literacy um shym la bud iaki NCTE Norms.
Napdeng ki 23 ngut ki nonghikai ba la thung haki Government LP Schools jong ka District naduh ka 23.05.2014 haduh ka 09.06.2015 , 14 ngut ki dei ki bym pat biang katba kum ka NCTE Norms kaba mut ba kaba kum kane ka rukom thungkam ka dei ka kam bamsap bad ka lah ruh ban don eiei ha lyndet jong Kane.
Ka Seng ka dawa namar Kata, ba ka tnad pule puthi ba kadei ban review biang iaka rukom thungkam ia kine ki 14 ngut lem kumta ka seng ka hap ban pyrkhat da kumwei bad wat ban thoh sha ka ingbishar ban tuklar lem halor kane khnangba ki samla wadkam wad jam kin ioh iaka hok.
Nalor kata, ka seng ka dawa ruh na ki bor ba dei khmih jongka tnad pule puthi ba nangne shakhmat ka rukom thungkam dei ban leh Noh haka rukom kaba shai bad kaba khuid ba suba da kaba ka tnad ka dei ban pyllait advertisement bad conduct daka interview ha shwa ban thung contractual Asst. Teacher ha Kano Kano ka skul.
Ka jingbiang haka kyrdan pule (educational qualifications) bad ka approval jongka SMC ne Headmaster bad Headmistress kam pat biang ban thung kum ki Contractual post Asst. Teacher haki government school hynrei dei ban da pyllait advertisement bad conduct iaka interview.
Lada ban thung iaki contractual post haki Wei ki tnad sorkar kum ka District Rural Development Agency bad kiwei ki lah ban pyllait advertisement bad khot interview, balei ka Education Department kam lah, Lada haka puthi kaba dei ka tynrai jongka roi ka par ka jingthungkam kan long kaba bamsap bad thurmur shano pat ka lawei jongka pule puthi bad ka jingnang jingstad. Na ka liang ka seng, shen ngin sa leit ban ialynduh ia u Minister I/c Education Dept ban tuklar lem halor kane ka bynta bad ruh ngin phah ruh iaki jingai jingmut halor ka Draft Education Policy ka bym pat shym la treikam haduh mynta, la ong u Bah Lurshaphrang Shangdiar publicity Secretary jong ka KSU SWKH District.
