Shillong, Nailur 12: U myntri rangbah ka jylla u Dr Mukul Sangma haba jubab ia ka jingkylli jong u Bah Phlastingwell Pangniang MLA jong ka HSPDP na Rambrai, u la ong ba ka sorkar Assam kala kyntait ban don ia ka boundary commission ban ia pynbeit ia u pud u sam ha pdeng ka jylla Assam bad Meghalaya.
Ha dien b aka iing dorbar ka la shim ia ka rai ha u snem 2012 ban dawa na ka sorkar pdeng ban don ia ka boundary commission ban ia pynbeit ia ki kam pud kam sam ha pdeng kine ki ar tylli ki jylla kaba la sah teng mynta la bun bun snem.
U myntri rangbah u la iathuh hapoh ka iing dorbar mynta ka sngi ba ka iing dorbar jong ka jylla Assam ruh kala shim ia ka rai hapoh ka iing dorbar jong ki kaba long pyrshah ia ka rai ba la shim da ka iing dorbar jong ka jylla Meghalaya.
Ka jingiapynbeit pud ha pdeng kine ki ar tylli ki jylla mynta ka sah hapdeng ka sorkar Meghalaya bad ka sorkar Assam kumno ban leh ia kane ka kam da ka jingiasngewthuh jingmut na baroh ar liang. Halor kane ka sorkar kala lum ia ki jingthoh ha kaba ia dei bad kito ki jaka kiba ka sorkar ka kam bad ia kine la dep phah sha ka sorkar Assam.
Naka liang jong ka sorkar, Meghalaya kam shym la shong kli kti ha kaba ia dei bad kane ka kam, la ong u myntri rangbah, “ Nga la ia kren bad u myntri rangbah ka jylla Assam ha kaba ia dei bad kane ka kam hynrei kila pan por”.
La iathuh hapoh ka iing dorbar ba na ka liang jong u myntri rangbah ka jylla Meghalaya u Dr Mukul Sangma ha ka 28 tarik jong u Naitung 2016 u la thoh da ka shithi sha u myntri rangbah ka jylla Assam ban beteng biang ia kane ka jingiakren pynbeit pud ha kaba ym pat ioh jubab haduh mynta.
La iathuh ba ka sorkar jylla mynta kala ioh ia ki kot ki sla kiba biang ban pynksan ia ki jingkam ha kaba ia dei bad ki jaka kiba ka sorkar Meghalaya ka kam. U myntri rangbah u la ong ba ha kaba ia dei bad kane ka kam don kam ia ka jingiatreilang na baroh ki liang kyntup ia ki seng sain pyrthei.
