Shillong, Lber 03: Ka seng ki nongtrei ka karkhana debilat Mawmluch Cherra Cement Limited ka Mawmluh Cherra Cement Employees Union (MCCEU) ka daw kyrpad jur ia ka sorkar ba kan pynbeit noh ia ki jingeh jong ki nongtrei katei ka MCCL.
U Bah Shanbolang Diengdieh president jong ka seng ha ka jingiadon lang kiwei ki nongkit kam haba kren ha ki lat pathai khubor mynta ka sngi ha Shillong press club la ong ba ki nongtrei jong ka MCCL ki long kum ki nongpang, ki kwah ban ioh ia ka dawai ban pynkoit noh ia ki.
Na ka liang jong ka seng ka kyntu ia ka sorkar ba kan pynbeit noh ia ka jingeh jong ki nongtrei ha kaba ia dei bad ka jingsiew ia ka tulop jong ki, kum ka seng kam pynpaw ruh ia ka jingsngewnguh ia kane ka sorkar ba kam shym la leh bein ia ki hynrei ka jingsiew kaba ki ioh kam dei shuh ka tulop ka long ka jingsiew ba shiteng shiliang.
Kum ka seng ki nongtrei kim kwah ban kren ne kynthoh ei ei ia ka jingpyniaid ia katei ka jaka namar ka dei ka jong ka sorkar bad kiba ia don bynta ha ka, ka ei kaba ki kwah ka long tang ba kin ioh noh ia ka ka bainong jong ki kiba la sah teng naduh u snem 2013 haduh mynta.
Ban lait na kane ka jingkordit kaba ki la ngat mynta, ki nongtrei kila kwah ruh ba ka sorkar kan kren shai noh la kan ai ia ka Volunteers Retirement Scheme ia kaba la juh tip kum ka VRS, lane kata ka jingiakhublei kti kaba ki khot ka ‘Golden Handshake”.
