Shillong, Iaiong 20: Haba kren sha ki paidbah jong ka jylla mynta ka sngi u myntri rangbah ka jylla u Cornad K Sangma u la ong ba ha kine ki sngi ba don ki lockdown la iohi ba ki khynnah ki ialehkai bad kane kan nym lah ban wanrah ia ka jingpyniajngai iwei na iwei.
U la kyntu ia ki dorbar shnong ban ia peit ia kane ba ka dei ban don ka jingpyniajngai iwei na iwei, lada ki khynnah ki mih sha bar ban ia lehkai kan long kaba eh ban bud ia ki kyndon ban don ka jingpynia jngai.
Ha ka juh ka por u mytnri rangbah u la ong ba kumba ka long ha ka pyrthei baroh kawei u Corona Virus u kham ktah bha ia ki riew tynmen, kumba u mytnri rangbah u la kyntu ba dei ban kiar katba lah na kaba mih sha bar.
Halor ka jingai jingmut ba dei ban batai sha phang u COVID-19 ha ka ktien bapher bapher, na ka liang jong u mytnri rangbah u la ong ba ka sorkar kala leh ia kane da kaba thoh ha ka ktien Khasi, Garo bad Hindi.
Ha ka juh ka por ka sorkar kala ioh ban ia kren bad ki doktor ba kin ai jingbatia sha ki paidbah ha ki ktien bapher bapher. Haba ia dei bad ka “Body management protocol” ka sorkar kala dep ban pynkhreh ha kaba ia dei bad kane bad ia kane la dep sam sha ki paidbah bad la dep ia kren bad ki DC bad kane kin sa pyntreikam ha ki District.
U Myntri rangbah u la ong ruh ba ki don kiba ia kren ha kaba ia dei bad ki nongbylla kiba dei na kiwei ki bynta jong ka jylla kiba sah kut ha kane ka jylla, na ka liang jong u myntri rangbah u la ong ba ka long kaba shai ba dei ka sorkar ka hap ban sumar ia ki kumba la leh ha kiwei ki jylla kane la leh da ka sorkar Meghalaya ruh.
Kala don ruh ka jingai jingmut ha ki jaka ba don ki par dei ban buh ia ki jaka sah jong ki briew haba ia dei bad kane ka sorkar kala dep ban leh ha bun ki jaka ba don ki par, lada dang don ba shah ieh ka sorkar kan sa peit ia kata ban pynthikna ba ia ki ruh dei ban iada.
