Shillong Lber 07: U nongialam ka Congress Legislature Party (CLP) jong ka party Congress u bah Ronnie V Lyngdoh u la kyrmen ba kane ka sorkar MDA-II mynta kan buh shwa ia ki paidbah ka jylla hakhmat ha shwa ba kin leh ia kano kano ka kam.
Ha kane ka Iing Dorbar Thawain ka jylla mynta ki party kiba don ha ka liang pyrshah kadei ka Congress kaba don 5 ngut ki MLA, All India Trinamool Congress (AITC) ka don 5 ngut ki MLA bad ka Voice of the People Party (VPP) ka don 4 ngut ki MLA.
Haba kylli mano ban long u nongialam ha ka liang pyrshah, u bah Ronnie u la ong ba katkum ka rukom kumba ju leh leh, kadei ban leit sha ka Congress hynrei ngin ia pyrkhat kaei ban leh ban wanrah ia ka jingiasaid ban pynmyntoi ia ki paidbah.
La ong ba wat la ki don ha ka liang pyrshah, kaba donkam ka long ba kin iakhun na bynta u paidbah khnang ba ka sorkar kan trei bha na bynta ka bha ka miat jong ki paidbah la ong u nongialam ka CLP u bah Ronnie V Lyngdoh bala wan skhi ha kaba pynsmai ia ka sorkar kaba thymmai.
Halor ka jingpulom ka jingthmu ban thaw sorkar hapdeng ka Congress, AITC, VPP, UDP, u bah Ronnie u la ong ba imat ki sngewdonkam ban ioh ia ka sorkar ba skhem bad ki iohi ba imat ka jindon jong ki MLA kam pat i lah ban thaw sorkar.
U nongialam ka CLP u kyrmen ba ka jingskhem ka sorkar kan pyntikna ban wanrah ia ki kam pynroi ia ka jylla la ka dei ha ka koit ka khiah, ka pule puthi bad kiwei de, la ong u bah Ronnie V Lyngdoh.
