Shillong, Lber 09: Ka Dorbar ki khlieh nongsynshar jong ka jylla Meghalaya ka Grand Council of Chiefs of Meghalaya ( kaba kynthup ia ka Federation of Khasi States, Ka Dorbar Ki Khlieh Nongsynshar Ka Ri Hynniewtrep, Ka Dorbar Ki Dolloi, & Council of Nokmas) ka ai khublei ia ki nongbat kam ba thymmai ka Kong Telinia Thangkhiew, MDC Chairperson, KHADC, u Bah Ardent M Basaiawmoit, MLA & MDC, Chief Executive Member(CEM) KHADC, u Bah Pyniaid Sing Syiem, MDC, Deputy Chairman, KHADC, bad ia u Ma Laitsing Shylla, MDC Chairman, JHADC, bad Ma Thombor Shiwat, MDC, Chief Executive Member, (CEM) JHADC, kiba la shah jied dang shen kum ki nongpyniaid jong ka Khasi bad Jaintia Hills Autonomous District Council.
U Bah John F Kharshiing, Chairman, Grand Council of Chiefs of Meghalaya, Chairman, Ka Dorbar Ki Khlieh Nongsynshar Ka Ri Hynniewtrep, Spokesperson, Federation of Khasi States, ha ka kyrteng ki Khlieh Nongsynshar ka bri Hynniewtrep, u la ai khublei kumjuh ia baroh sanphew phra (58) ngut ki MDC KHADC (29) bad JHADC(29).
Ha ka juh ka por na ka liang ka Dorbar ki la kyntu jur ba ka election MDC ka la kut, bad ka por ka dawa ia ki bor KHADC bad JHADC ban thaw lad ban pynjanai (codify) ia ki ain (Act bad ki Rule) kiba bun hapoh JHADC bad KHADC bad khamtam jong ki 53 + 1 tylli ki Hima/Elaka, ha Khasi Hills bad 18 +1 Elaka ha Jaintia Hills, kiban long ka stieh ia ki khun ki hajar ha kane ka juk kaba mynta ha kaba ki ia kren beit tang da ki Ain bad ki Rule.
Ka Dorbar Ki Khlieh Nongsynshar ka khmih lynti bad kyrmen ba ki 58 ngut ki MDC kiba dang shuh jop kin buh ia ka thong ban pyndep la kumno kumno ia ki Act bad ki Rule kiba bniah jong ki Hima Khasi States bad ki Elaka kiba don hapoh ki Constituency jong ki kum kawei na ki kam kiba hakhmat duh jong ki.
Na ka liang ka Dorbar kan iai trei kumba juh long man ma mih ki EC kiba thymmai ban tyrwa ban iatreilang lang bad baroh ar ki Executive Committee, ba thymmai jong ka KHADC bad JHADC na ka bynta ban nang pynjanai ia ka synshar khadar bad ka bishar na ka bynta ka bit ka biang jong ka Ri bad ka jaidbynriew.(SP News)
